Բռնագանձվել է ավելի քան 35 մլրդ դրամ․ ՀԿԱԾ

Հարկադիր կատարումն ապահովող ծառայությունը (ՀԿԱԾ) ամփոփել է 2026 թվականի առաջին կիսամյակի գործունեության արդյունքները։

Գլխավոր հարկադիր կատարող Սիրո Ամիրխանյանի գլխավորությամբ կայացած հաշվետու խորհրդակցության ընթացքում ներկայացվել են Ծառայության Երևանի և տարածքային ստորաբաժանումների 2026 թվականի առաջին կիսամյակի գործունեության արդյունքները։ Խորհրդակցությանը մասնակցել են Ծառայության ղեկավար կազմը, կենտրոնական մարմնի և տարածքային ստորաբաժանումների ղեկավարները։

Ամփոփ տվյալների համաձայն՝ 2026 թվականի առաջին կիսամյակում պահանջատերերի օգտին բռնագանձվել է ավելի քան 35 մլրդ դրամ, ինչը նախորդ տարվա նույն ժամանակահատվածի համեմատ աճել է 19 տոկոսով։

Պետբյուջեի օգտին բռնագանձվել է ավելի քան 12 մլրդ դրամ, ինչը շուրջ 18 տոկոսով գերազանցում է 2025 թվականի համադրելի ցուցանիշը։ Իրավաբանական անձանց օգտին բռնագանձված գումարը կազմել է շուրջ 22 մլրդ դրամ՝ աճելով 23 տոկոսով, իսկ ֆիզիկական անձանց օգտին բռնագանձված գումարն ավելացել է 9 տոկոսով։

Հաշվետու ժամանակահատվածում գանձվել է նաև ավելի քան 2,5 մլրդ դրամ կատարողական վճար (կատարողական ծախս), ինչը 2025 թվականի առաջին կիսամյակի համեմատ ավելի է շուրջ 64 մլն դրամով։

Խորհրդակցության ընթացքում ներկայացվել են նաև «Կատարողական վարույթի մասին» նոր օրենքի կիրարկման ընթացքը և հարկադիր կատարման թվային գործիքների կատարելագործման ուղղությամբ իրականացվող աշխատանքները։ Մասնավորապես, ստեղծվել է ծրագրային հնարավորություն, որը թույլ է տալիս հաշվառել նաև ոչ գույքային բնույթի կատարողական վարույթները։

Ամփոփելով կիսամյակային արդյունքները՝ գլխավոր հարկադիր կատարող Սիրո Ամիրխանյանը դրական է գնահատել Ծառայության գործունեության ցուցանիշները՝ միաժամանակ հանձնարարականներ տալով առանձին ուղղություններով աշխատանքների արդյունավետությունն ու միասնական մոտեցումները բարելավելու նպատակով։