Զելենսկին՝ տարածքային հնարավոր զիջումների մասին. Bloomberg
Ուկրաինան ուսումնասիրում է Միացյալ Նահանգների կողմից առաջարկված նախաձեռնությունը, որը վերաբերում է Դոնբասում ազատ տնտեսական գոտու ստեղծմանը։ Այդ մասին Bloomberg-ին տված հարցազրույցում հայտարարել է Ուկրաինայի նախագահ Վլադիմիր Զելենսկին։ Նրա խոսքով՝ գաղափարը նախատեսում է հատուկ իրավական և հարկային ռեժիմի սահմանում այն տարածքներում, որտեղից կհանվեն զորքերը։
Զելենսկին նշել է, որ առաջարկվող ձևաչափը բարդ է, սակայն, իր բնորոշմամբ, կարող է համարվել արդար։ Նա ընդգծել է, որ ծրագրի իրականացումը հնարավոր կլինի միայն այն դեպքում, եթե Ռուսաստանը կատարի համարժեք քայլեր, ինչպես նաև նախաձեռնությունը քննարկվի և աջակցություն ստանա Ուկրաինայի ներսում։
Նախագահի խոսքով՝ ազատ տնտեսական գոտին կարող է ստեղծվել Դոնբասի արևելյան հատվածների որոշ տարածքներում և դիտարկվել որպես փոխզիջումային տարբերակ։ Այն ենթադրում է հակամարտող կողմերի զորքերի հեռացում բավարար հեռավորության վրա՝ տարածաշրջանում կյանքի նորմալ պայմաններ ապահովելու նպատակով։
Զելենսկին նաև ներկայացրել է այլընտրանքային մոտեցում, որի համաձայն հնարավոր կլիներ դադարեցնել ռազմական գործողությունները՝ զորքերը թողնելով իրենց դիրքերում, իսկ չլուծված հարցերը կարգավորել դիվանագիտական ճանապարհով։ Նրա խոսքով՝ այդ տարբերակը կնշանակեր շփման գծի, այլ ոչ թե ամբողջ հակամարտության սառեցում և կլիներ ավելի հեշտ վերահսկելի Ուկրաինայի միջազգային գործընկերների կողմից։
Բացի այդ, Ուկրաինայի նախագահը հայտնել է, որ մտադիր է անձամբ քննարկել ԱՄՆ նախագահ Դոնալդ Թրամփի հետ Վաշինգտոնի կոնկրետ պարտավորությունները՝ թշնամու կողմից հնարավոր ագրեսիայի դեպքում։ Նրա խոսքով՝ կարևոր է ստանալ ոչ միայն ընդհանուր խոստումներ, այլև հստակ մեխանիզմներ։
