Փորձում են աշխարհը բաժանել միմյանց միջև. Մակրոնը կոչով դիմել է գերտերություններին

Ֆրանսիայի նախագահ Էմանուել Մակրոնը հայտարարել է, որ ԱՄՆ-ն, Ռուսաստանը և Չինաստանը փորձում են «աշխարհը բաժանել միմյանց միջև»։ Այդ մասին նա ասել է Փարիզում կազմակերպված հանդիպման ընթացքում, որտեղ մասնակցել են ավելի քան 150 դեսպաններ, հայտնում է The New York Times-ը։

Մակրոնի խոսքով՝ ժամանակակից միջազգային համակարգը գտնվում է լուրջ ճգնաժամի մեջ։ Նրա գնահատմամբ՝ աշխարհը դարձել է «անկառավարելի», քանի որ նախկինում գործող կանոնները փաստացիորեն անտեսվում են, իսկ պետությունների միջև համագործակցությունը էապես թուլացել է։

Ֆրանսիայի նախագահը նշել է, որ այդ գործընթացների փոխարեն ի հայտ են եկել խոշոր տերությունների փորձերը՝ աշխարհաքաղաքական ազդեցության գոտիները վերաձևելու և դրանք միմյանց միջև բաժանելու ուղղությամբ։ Նա ընդգծել է, որ նման միտումները վտանգում են միջազգային կայունությունը։

Մակրոնի խոսքով՝ ԱՄՆ-ն, Ռուսաստանը և Չինաստանը վերջին տարիներին աստիճանաբար հեռացել են իրենց որոշ դաշնակիցներից և հրաժարվել այն միջազգային կանոններից, որոնք դեռ ոչ վաղ անցյալում իրենք էին առաջ մղում։ Նրա խոսքով՝ այդ փոփոխությունները խորացնում են անվստահությունը միջազգային հարաբերություններում։