Այդ պահանջը ներառվել է Ուկրաինայի հետ բանակցությունների օրակարգում. ԱՄՆ նախագահ
ԱՄՆ նախագահ Դոնալդ Թրամփը հայտարարել է, որ ստիպված է եղել զգալի ջանքեր գործադրել Ուկրաինային նախկինում տրամադրված ֆինանսական միջոցների վերադարձի ուղղությամբ։ Նրա խոսքով՝ այդ գործընթացը պետք է ապահովվի հազվագյուտ մետաղների վերաբերյալ ձեռք բերված համաձայնագրի միջոցով։
Fox News հեռուստաալիքին տված հարցազրույցում Թրամփը նշել է, որ ԱՄՆ նախկին նախագահ Ջո Բայդենի վարչակազմն Ուկրաինային փոխանցել է շուրջ 350 միլիարդ դոլար, սակայն այդ գումարներից ԱՄՆ-ն, նրա ձևակերպմամբ, հետ չի ստացել ոչինչ։ Թրամփը ընդգծել է, որ իր նախաձեռնությամբ կնքվել է համաձայնություն, որի շրջանակում ԱՄՆ-ն ակնկալում է ստանալ հազվագյուտ մետաղներ։
Սպիտակ տան ղեկավարի խոսքով՝ Վաշինգտոնը հստակ դիրքորոշում է հայտնել, որ հետագա համագործակցության դեպքում ակնկալում է վերադարձնել տրամադրված միջոցները։ Նա նշել է, որ այդ պահանջը ներառվել է Ուկրաինայի հետ բանակցությունների օրակարգում։
Թրամփը գործարքը գնահատել է որպես «շատ արդար» և հավելել, որ դրա իրականացմամբ ԱՄՆ-ն կկարողանա վերականգնել իր ֆինանսական կորուստները։
