Չինաստանը հերքում է ԱՄՆ-ի մեղադրանքները

Չինաստանը մերժում է ԱՄՆ-ի կողմից հնչեցվող մեղադրանքները, ըստ որոնց Պեկինը իբր ներգրավված է կիբերհարձակումների մեջ։ Այդ մասին հայտարարել է Չինաստանի դեսպանությունը Վաշինգտոնում՝ արձագանքելով արևմտյան լրատվամիջոցների հրապարակումներին, որոնք խոսում են չինական հատուկ ծառայությունների ենթադրյալ հաքերային ակտիվության մասին։

Դեսպանության պաշտոնական ներկայացուցիչ Լյու Պենյույի խոսքով՝ ԱՄՆ-ի կողմից հնչեցվող պնդումները անհիմն են և հիմնված են շահարկումների վրա։ Նրա հայտարարության մեջ ընդգծվում է, որ կիբերանվտանգության թեման օգտագործվում է Չինաստանի դեմ տեղեկատվական արշավ իրականացնելու և երկրի հեղինակությունը վնասելու նպատակով։

Լյու Պենյույը նշել է, որ Պեկինը կտրականապես դեմ է չհաստատված մեղադրանքներին, ինչպես նաև «չինական հաքերային սպառնալիքների» մասին ապատեղեկատվության տարածմանը։ Նրա խոսքով՝ նման հայտարարությունները նպաստում են միջազգային լարվածության աճին և խաթարում են փոխադարձ վստահությունը երկրների միջև։

Չինաստանի դիվանագիտական ներկայացուցչությունը ևս մեկ անգամ վերահաստատել է, որ երկիրը պաշտպանում է կիբերանվտանգության ոլորտում միջազգային համագործակցությունը և կողմ է խնդիրների լուծմանը երկխոսության ու բազմակողմ մեխանիզմների միջոցով։