Պեկինը արձագանքել է Վաշինգտոնի կողմից Թայվանին զենքի վաճառքին
Չինաստանի իշխանությունները պատասխան սահմանափակիչ միջոցներ են սահմանել ԱՄՆ-ի ռազմաարդյունաբերական համալիրի 20 ընկերության նկատմամբ՝ Թայվանին զենքի վաճառքի պատճառով։ Այդ մասին հայտարարել է Չինաստանի արտաքին գործերի նախարարությունը։
Ավելի վաղ ԱՄՆ Պենտագոնի Պաշտպանական համագործակցության և անվտանգության գործակալությունը տեղեկացրել էր, որ Թայվանին վաճառքի համար ԱՄՆ-ի կողմից հաստատված զենքի, ռազմական տեխնիկայի և ծառայությունների ընդհանուր արժեքը գերազանցում է 11 միլիարդ դոլարը։ Գործարքները ներառում են Javelin հակատանկային համակարգեր, ALTIUS-700M և ALTIUS-600 անօդաչու համակարգեր, AH-1W SuperCobra ուղղաթիռների պահեստամասեր, HIMARS համազարկային կրակի ռեակտիվ համակարգեր, M107A7 ինքնագնաց հրետանային կայանքներ, ինչպես նաև TOW հակատանկային հրթիռային համալիրներ։
Չինաստանի արտաքին գործերի նախարարության հայտարարության մեջ նշվում է, որ ԱՄՆ-ի կողմից իրականացված լայնածավալ զինամատակարարումները Թայվանին խախտում են «մեկ Չինաստան» սկզբունքը և Չինաստան-ԱՄՆ երեք համատեղ կոմյունիկեները։ Պեկինի գնահատմամբ՝ այդ քայլերը դիտարկվում են որպես միջամտություն երկրի ներքին գործերին և վնասում են Չինաստանի ինքնիշխանությունն ու տարածքային ամբողջականությունը։
