Իսակով-Արշակունյաց ճանապարհահատվածի կառուցման համար ավելի քան 7,5 մլրդ դրամ կհատկացվի
Երևանի 2026 թվականի բյուջեով ճանապարհների և ենթակառուցվածքների արդիականացման շրջանակներում ասֆալտապատման ընթացիկ աշխատանքներին կուղղվի 2 միլիարդ 615 միլիոն դրամ։
Իսակով-Արշակունյաց պողոտա ճանապարհահատվածի կառուցման համար կհատկացվի ավելի քան 7 մլրդ 521 մլն դրամ։ Երևանի ավագանու դեկտեմբերի 23-ի նիստում քննարկման ներկայացված 2026 թվականի բյուջեի նախագծի համաձայն՝ փողոցների միջին նորոգմանը կուղղվի 1 մլրդ 677 մլն դրամ։
Նախատեսվում է 337 մլն դրամի սահմաններում հիմնանորոգել Սարալանջ-Ավետիսյան-Փափազյան փողոցների հատման խաչմերուկը։ Կշարունակվի Նուբարաշենի վերջնամասի փլուզված հատվածի հիմնանորոգումը։ Կիևյան և Լամբադա կամուրջների հիմնանորոգման աշխատանքների իրականացմանը կուղղվի 965 մլն դրամ։ Մայրուղիների, թեքահարթակների և եզրաքարերի կառուցմանը, վերակառուցմանն ու վերականգնմանը կուղղվի 1 մլրդ 125 մլն դրամ, որի շրջանակներում կիրականացվի նաև Ամիրյան փողոցի մայթերի վերանորոգումը։
