Պուտինը անդրադարձել է հակամարտությանը և մի շարք հայտարարություններ արել
ՌԴ նախագահ Վլադիմիր Պուտինը ուղիղ եթերի և մեծ մամուլի ասուլիսի ընթացքում անդրադարձել է ուկրաինական հակամարտությանը՝ հայտարարելով, որ Մոսկվան առայժմ չի տեսնում Կիևի լիարժեք պատրաստակամությունը խաղաղ կարգավորման համար։
Նրա խոսքով՝ ռուսական կողմը նկատում և արձանագրում է որոշակի ազդակներ ուկրաինական իշխանություններից, որոնք վկայում են հնարավոր երկխոսության պատրաստակամության մասին։ Միևնույն ժամանակ Պուտինը նշել է, որ Ռուսաստանը պատրաստ է վարել բանակցություններ ուկրաինական ճգնաժամի կարգավորման շուրջ՝ հիմնվելով այն սկզբունքների վրա, որոնք ներկայացվել էին 2024 թվականի հունիսին։
ՌԴ նախագահի հայտարարությամբ՝ Մոսկվան պատրաստ է և ցանկանում է ավարտել հակամարտությունը խաղաղ միջոցներով։ Սակայն նա ընդգծել է, որ ռազմաճակատում նախաձեռնությունը ամբողջությամբ գտնվում է ռուսական ուժերի ձեռքում, իսկ ՌԴ զինված ուժերը հարձակողական գործողություններ են իրականացնում շփման գծի ողջ երկայնքով։
