Ադրբեջանական բենզինի մատակարարումը Հայաստան շարունակական է լինելու. Պապոյան
Էկոնոմիկայի նախարար Գևորգ Պապոյանը NEWS.am-ի հետ զրույցում հաստատեԼ Է ադրբեջանական լրատվամիջոցների տարածած տեղեկությունն այն մասին, որ ադրբեջանական բենզինի առաջին խմբաքանակն արդեն Հայաստանի ճանապարհին է։
Ադրբեջանական վառելիք տեղափոխող 20 վագոնը, նախարարի խոսքով, առաջիկա օրերին կհասնի Հայաստան։
«Մեր խնդիրն է եղել բիզնեսներին բերել մի դաշտ, որ առևտուր անեն պատերազմելու փոխարեն. պատերազմը բերում է զոհեր, կորուստներ, իսկ առևտուրը՝ բարեկեցություն»,- ասԵԼ Է Պապոյանը։
Հարցին՝ կա՞ հստակ պայմանավորվածություն Բաքվի հետ, որ ադրբեջանական վառելիքի մատակարարումը շարունակական է լինելու, Էկոնոմիկայի նախարարը դրական պատասխան տվեց. «Իհարկե կա պայմանավորվածություն, բայց մնացածը կախված է շուկայական հետագա պայմաններից»։
Թե երբ, ինչ ծավալով և ժամկետում կլինի ադրբեջանական վառելիքի հետագա մատակարարումը, Պապոյանը չի հստակեցրել։ «Տարբեր հարցեր կան՝ տրանսպորտի, տեղափոխման և այլնի հետ կապված, բիզնեսներն արդեն կհամաձայնեցնեն միմյանց հետ»,- նշել Է նա։
Հարցին, թե ինչ սակագնով է հայկական մասնավոր ընկերությունը գնել ադրբեջանական կողմից վառելիքը, Պապոյանը չհստակեցրեց՝ ասելով, որ դա մասնավոր տիրույթում է, իրենք դրան չեն միջամտում։
«Ճիշտ չէ, որ մենք խառնվենք գնի հարցերին։ Պետության գործն այստեղ միջավայր ստեղծելն է. երբ մենք բենզին ենք ներմուծում Եգիպտոսից, Ռուբինիայից կամ Ռուսաստանից, ի՞նչ ենք անում՝ նույնը՝ անհրաժեշտ իրավապայմանագրային դաշտ, քաղաքական միջավայր է ստեղծվում, քաղաքական համաձայնություններ են ձեռք բերվում, մնացածն արդեն բիզնեսն է անում»,- նշել է Էկոնոմիկայի նախարարը։
Հարցին՝ ի՞նչ գնով է ադրբեջանական բենզինը վաճառվելու հայաստանյան շուկայում, Պապոյանն արձագանքեց. «Բարդ է հիմա ասել՝ առաջին մատակարարման դեպքում ծախսերը ստանդարտ չեն, հաջորդիվ ևս կարծես ստանդարտ չի լինելու։ Երբ որոշակի շուկայական քիչ թե շատ կայուն, տեսանելի կոնյուկտուրա կձևավորվի, կկարողանանք հստակ ասել։ Առաջին անգամ գնալ ինչ-որ բան բերել-վաճառելը որոշ ընկերություններ կարող են ավելի էժան գներով վաճառել, որոշներն ավելի բարձր գներով, բայց հետագա վերադասավորումներն են, որ ճշգրտումներ են մտցնում մասնակիցների վարքագծում։ Մասնավոր հատվածում գինը որոշվում է մրցակցությունից ելնելով. մեր խնդիրներ է ապահովել հնարավորինս շատ մասնակիցներ շուկայում և տարբեր աղբյուրներ. դա կբերի մրցակցության աճի և, հետևաբար, գների հնարավորինս նվազման»։
Հիշեցնենք, որ այսօր Ադրբեջանից Հայաստան է ուղարկվում նավթամթերքի առաջին խմբաքանակը։
