Կիպրոսի դեսպանը կանչվել է Իրանի ԱԳՆ` Կիպրոսի և ԱՄԷ պաշտոնյաների համատեղ հայտարարության պատճառով

Թեհրանում Կիպրոսի դեսպան Պետրոս Նակուզիսին կանչել են Իրանի ԱԳՆ, որտեղ երկրի փոխարտգործնախարար և Պարսից ծոցի հարցերով գլխավոր տնօրեն Մոհամմադ Ալիբեկը դիվանագետին է հանձնել բողոքի նոտա: Այս մասին տեղեկանում ենք Tasmin գործակալությունից:

Իրանական կողմի վրդովմունքի պատճառը Կիպրոսի և ԱՄԷ պաշտոնյաների համատեղ հայտարարությունն է, որը Թեհրանը համարել է միջամտություն երկրի ներքին գործերին։ Փոխնախարար Մոհամմեդ Ալիբեկը Կիպրոսի դեսպանին հիշեցրել է, որ երեք կղզիները՝ Մեծ Թունբը, Փոքր Թունբը և Բու Մուսան, Իրանի տարածքի անբաժանելի մասն են կազմում, և Իրանի Իսլամական Հանրապետության ինքնիշխանությունն այդ երեք կղզիների նկատմամբ կասկածից վեր է։ Նաև ընդգծվել է, որ Իրանը խստորեն դատապարտում է իր տարածքային ամբողջականության դեմ ուղղված ցանկացած պահանջ՝ դրանք դիտարկելով որպես ազգային ինքնիշխանության և պետությունների տարածքային ամբողջականության հարգանքի հիմնարար սկզբունքի խախտում։

Նա կոչ է արել կիպրական կողմին «անհապաղ ուղղել կոպիտ սխալը և զերծ մնալ նման գործողությունների կրկնությունից ապագայում»։