Փարիզը պահանջում է անվտանգության երաշխիքներ՝ մինչև զիջումների քննարկումը
Ֆրանսիայի նախագահ Էմանուել Մակրոնի շրջապատին մոտ գտնվող աղբյուրը հայտարարել է, որ նախքան Մոսկվայի պահանջով տարածքների կամ որևէ զիջման շուրջ քննարկումներ սկսելը՝ Ուկրաինան պետք է ստանա «անվտանգության ամուր երաշխիքներ»։ Այս մասին հաղորդում է AFP-ն։
Այս դիրքորոշումը հնչեցվել է երկուշաբթի օրը Բեռլինում տեղի ունեցած հանդիպումներից հետո։
«Մենք նախևառաջ ցանկանում ենք անվտանգության ամուր երաշխիքներ ստանալ՝ նախքան տարածքների վերաբերյալ որևէ քննարկում անելը։ Տարածքների հարցում որոշակի առաջընթաց է գրանցվել՝ հիմնվելով «Ցանկացողների կոալիցիայի» կատարած աշխատանքի վրա և ամերիկյան աջակցության պայմանների հստակեցման շնորհիվ»,- նշել է աղբյուրը։
Հիշեցնենք՝ Ուկրաինայի նախագահ Վլադիմիր Զելենսկին նախկինում հայտարարել էր, որ Միացյալ Նահանգները Կիևին առաջարկել է անվտանգության երաշխիքներ, որոնք նման են ՆԱՏՕ-ի Հյուսիսատլանտյան պայմանագրի 5-րդ հոդվածին։ Այս տեղեկությունը հաստատել են նաև մի շարք ամերիկացի պաշտոնյաներ՝ անանունության պայմանով։
