ԵՄ մի քանի երկրներ Ռուսաստանին «անվտանգության անմիջական և երկարաժամկետ սպառնալիք» են անվանել
«Ռուսաստանը ներկայացնում է մեր անվտանգության, խաղաղության և կայունության համար ամենակարևոր, անմիջական և երկարաժամկետ սպառնալիքը եվրատլանտյան տարածաշրջանում»,- ասված է Շվեդիայի, Ֆինլանդիայի, Լեհաստանի, Էստոնիայի, Լատվիայի, Լիտվայի, Ռումինիայի և Բուլղարիայի այսօր ընդունված համատեղ հայտարարության մեջ։
«Ռուսաստանի ռազմավարական նպատակները մնում են անփոփոխ՝ ստեղծել բուֆերային գոտի, որը ձգվում է Արկտիկական տարածաշրջանից մինչև Բալթիկ և Սև ծովեր մինչև Միջերկրական ծով։ Եվրամիության և ՆԱՏՕ-ի արևելյան թևը գտնվում է այս սպառնալիքի առաջնագծում, բայց այն ազդում է ամբողջ եվրոպական մայրցամաքի վրա և անհապաղ և համակարգված գործողություններ է պահանջում»,- նշված է համատեղ հայտարարության մեջ։
Ըստ Եվրամիության ութ երկրների հայտարարության՝ իրենք ակտիվորեն իրականացնում են մարտին, հունիսին և հոկտեմբերին Եվրոպական խորհրդի նիստերում, ինչպես նաև Հաագայում ՆԱՏՕ-ի գագաթնաժողովում ընդունված «պատմական որոշումները», որոնք ուղղված են եվրատլանտյան զսպման և պաշտպանության ամրապնդմանը, ներառյալ պաշտպանական ծախսերը ՀՆԱ-ի 5%-ին հասցնելու և կարողություններ կառուցելու պարտավորությունները։
«Ողջունում ենք «Եվրոպայում պաշտպանական պատրաստվածության 2030 թվականի ճանապարհային քարտեզը» և Եվրոպայում պաշտպանական պատրաստվածության ամրապնդման նախաձեռնությունները, մասնավորապես՝ «Արևելյան թևի դիտարկում» ծրագրի միջոցով: Արևելյան թևի հետևողական ամրապնդումը հյուսիսից հարավ բոլոր ոլորտներում՝ ցամաքային, օդային, ծովային, կիբեր և տիեզերական հզոր կարողություններ է պահանջում»,- մասնավորապես նշված է փաստաթղթում:
