Թաիլանդի և Կամբոջայի առաջնորդները համաձայնել են դադարեցնել ռազմական գործողությունները․ Թրամփ

ԱՄՆ նախագահ Դոնալդ Թրամփը հայտարարել է, որ Թաիլանդի և Կամբոջայի առաջնորդները վերջերս կայացած հեռախոսազրույցի ընթացքում համաձայնել են հրադադար հաստատել:

«Այսօր առավոտյան ես շատ լավ զրույց ունեցա Թաիլանդի վարչապետ Անութին Չանվիրակունի և Կամբոջայի վարչապետ Հուն Մանեթի հետ՝ կապված նրանց վաղեմի հակամարտության չափազանց տխուր վերսկսման հետ։ Նրանք համաձայնել են դադարեցնել բոլոր ռազմական գործողությունները՝ սկսած այս երեկոյից, և վերադառնալ նախնական խաղաղ համաձայնագրին, որը ես նրանց հետ կնքել եմ Մալայզիայի վարչապետ Անվար Իբրահիմի օգնությամբ»,-գրել է Թրամփը Truth Social սոցցանցում։

Թաիլանդի և Կամբոջայի սահմանամերձ շրջաններում ռազմական գործողությունների սրացումը սկսվել է անցած հանգստյան օրերին։ Կողմերը միմյանց մեղադրել են հրադադարը խախտելու մեջ, Թաիլանդի ռազմաօդային ուժերը ավիահարվածներ են հասցրել։