Ադրբեջանի ակնկալիքները խաղաղության գործընթացից․ Բայրամովը մանրամասնում է
Ադրբեջանի արտաքին գործերի նախարար Ջեյհուն Բայրամովը Վիեննայում անցկացվող Եվրոպայի անվտանգության և համագործակցության կազմակերպության (ԵԱՀԿ) նախարարական խորհրդի 32-րդ նստաշրջանի շրջանակում հանդիպել է Եվրամիության արտաքին գործերի և անվտանգության քաղաքականության բարձր ներկայացուցիչ Կայա Կալլասի հետ։ Քննարկվել են տարածաշրջանային անվտանգության հարցերը, Հարավային Կովկասում հակամարտություններից հետո ձևավորված իրողություններն, ինչպես նաև վերջին զարգացումները և խաղաղության օրակարգի հետ կապված ակնկալիքները։
Բայրամովը հանդիպել է նաև ԵԱՀԿ գլխավոր քարտուղար Ֆերիդուն Սինիրլիօղլուին։ Զրույցի ընթացքում անդրադարձ է եղել Ադրբեջանի և ԵԱՀԿ-ի երկկողմ համագործակցության հիմնական ուղղություններին, կազմակերպության առջև կանգնած մարտահրավերներին, տարածաշրջանային և միջազգային անվտանգության խնդիրներին, ինչպես նաև Ադրբեջանի և Հայաստանի միջև խաղաղության գործընթացին։ Ընդգծվել է, որ Եվրոպայում անվտանգության լուրջ մարտահրավերների պայմաններում կարևոր է պահպանել միջազգային իրավունքը, մասնավորապես՝ ինքնիշխանության, տարածքային ամբողջականության և միջազգայնորեն ճանաչված սահմանների անձեռնմխելիության սկզբունքները։
Նախարար Բայրամովը ներկայացրել է հետհակամարտական շրջանում տարածաշրջանում ստեղծված իրավիճակը, Վաշինգտոնի գագաթնաժողովի արդյունքներն ու Ադրբեջանի ակնկալիքները խաղաղության գործընթացից։
Նշվել է, որ Մինսկի գործընթացի և դրա հետ կապված կառույցների լուծարումը կարևոր է ԵԱՀԿ-ի արդյունավետության բարձրացման և դրա գործունեությունը տարածաշրջանային իրողությունները հաշվի առնող ձևով կազմակերպելու համար։
Բայրամովը ներկայացրել է Վաշինգտոնի գագաթնաժողովում ձեռք բերված պայմանավորվածությունները, խաղաղության հեռանկարները և տարածաշրջանում տրանսպորտային միջանցքների ծրագրերը։
