Մերցը հեռախոսազրույց է ունեցել Ալիևի հետ՝ անդրադառնալով տարածաշրջանային խաղաղությանը
Գերմանիայի կանցլեր Ֆրիդրիխ Մերցը շնորհավորել է նախագահ Իլհամ Ալիևին Ադրբեջանի և Հայաստանի միջև խաղաղ օրակարգի առաջխաղացման ուղղությամբ ձեռք բերված հաջողությունների համար։ Մերցը ընդգծել է, որ Գերմանիան աջակցում է Հարավային Կովկասում կայունության հաստատմանը և կարևորում է կողմերի խաղաղ նախաձեռնությունները։
Իլհամ Ալիևը, իր հերթին, նշել է, որ Ադրբեջանը շարունակելու է նպաստել տարածաշրջանում կայուն և տևական խաղաղության ապահովմանը՝ ընդգծելով Բաքվի պատրաստակամությունը շարունակելու կառուցողական քայլերը։
Զրույցի ընթացքում կողմերը կարծիքներ են փոխանակել Ադրբեջանի և Գերմանիայի երկկողմ հարաբերությունների հետագա զարգացման հեռանկարների շուրջ՝ ընդգծելով քաղաքական երկխոսության և համագործակցության ընդլայնման հնարավորությունը տարբեր ոլորտներում։
