Կամավոր ատեստավորված ուսուցիչների խրախուսման միջոցները կավելանան շուրջ 2,16 մլրդ դրամով

ԿԳՄՍ նախարար Ժաննա Անդրեասյանը՝ ներկայացնելով համապատասխան որոշման նախագիծը Կառավարության այսօրվա նիստին ասել է Կամավոր ատեստավորված ուսուցիչների խրախուսմանը 2025 թվականին պլանավորված էր շուրջ 8 մլրդ 673 մլն 771 հազար 400 դրամ:

«Մենք առաջարկոմ ենք լրացնել գումարը ևս շուրջ 2,16 մլրդ դրամով, ինչը նշանակում է, որ միայն կամավոր ատեստավորման համակարգին 2025 թվականին կուղղվի ավելի քան 10 մլրդ դրամ»,- ասել է Անդրեասյանը: 

«2018 թվականից ի վեր ուսուցիչների ֆոնդն էլ զգալիորեն աճել է 2025 թվականի նկատմամբ, և միայն ուսուցիչների վարձատրության ֆոնդը 37 մլրդ դրամով աճ է գրանցել 2018-ի համեմատությամբ, ինչը նշանակում է, որ 67 տոկոս աճ ունենք 2018-ի նկատմամբ: Միայն կամավոր ատեստավորման համակարգը 10 մլրդ դրամ հատկացում է ստանում այս տարի:

Իսկ 2026 թվականի պետբյուջեով արդեն միայն ուսուցիչների խրախուսման ծրագրերին, այսինքն՝ ուսուցիչների աշխատավարձը սրա վրա հաշվարկված չէ, ավելի քան 20 մլրդ դրամ է հատկացվելու, և 2024 թվականի համեմատությամբ կրկնակի ավելի է այն բյուջեն, որն ուղղում ենք ուսուցիչների խրախուսման ծրագրերին»,- ասել է նա:

Նախարարը միաժամանակ ընդգծել է, որ այսօր արդեն 700 հազար դրամ ստացող ուսուցիչները մեր իրականության մաս են:

Վարչապետ Նիկոլ Փաշինյանն արձանագրել է. «Ատեստավորումը և դրա արդյունքները բերելու են լրացուցիչ տնտեսական զարգացման, ինչն էլ իր հետ բերելու է լրացուցիչ ֆինանսական հարկային եկամուտներ: Բացառված է, որ չլինի այդպես»: