Մխիթարյանի հուզիչ գրառումը՝ «Ինտերի» հետ պայմանագիրը երկարաձգելուց հետո

Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը սոցիալական ցանցերի իր էջերում գրառում է կատարել՝ անդրադառնալով իտալական գրանդի հետ գործող պայմանագրի երկարաձգմանը։

Հայ ֆուտբոլիստը, չթաքցնելով իր ուրախությունը միլանյան ակումբում ելույթները շարունակելու կապակցությամբ, մասնավորապես գրել է.

«Իմ գույները, իմ տունը։ Շարունակում ենք միասին պայքարել յուրաքանչյուր գոլի համար։ Առա՜ջ, «Ինտեր»»,- նշել է Հենրիխ Մխիթարյանը:

Հիշեցնենք, որ ավելի վաղ «ներաձուրիների» մամուլի ծառայությունը պաշտոնապես հայտարարել էր փորձառու խաղացողի հետ բանակցությունների բարեհաջող ավարտի և նոր համաձայնագիր ստորագրելու մասին։ Պաշտոնական հաղորդագրության համաձայն՝ ակումբի ղեկավարության և կիսապաշտպանի միջև կնքված նոր պայմանագիրը նախատեսված է ևս 3 տարով՝ մինչև 2027 թվականի հունիսի 30-ը։