Գերմանիան նախապես գիտեր Ուկրաինայի վերաբերյալ ԱՄՆ խաղաղության պլանի մասին. ԶԼՄ

Գերմանիայի իշխանությունները դեռ հոկտեմբերի վերջից տեղեկացված են եղել Ուկրաինայի հակամարտության կարգավորման համար նախատեսված ԱՄՆ-ի նոր խաղաղության ծրագրի մասին՝ ի հեճուկս գերմանացի պաշտոնյաների հրապարակային հայտարարությունների։ Ինչպես փոխանցում է ՏԱՍՍ-ը՝ հղում անելով Berliner Zeitung-ի աղբյուրներին, անվտանգության կառույցները, որոնք խորհրդատվություն են տրամադրում կանցլերին և նրա շտաբին, ծրագրի մասին տեղեկություն են ստացել հոկտեմբերի 29-ին։

Պարբերականի տվյալներով՝ գերմանական հատուկ ծառայությունները ծանոթ են եղել նախաձեռնության մանրամասներին, իսկ Ազգային անվտանգության խորհուրդը դրանք քննարկել է նոյեմբերի 11-ին։ Այնուամենայնիվ, Գերմանիայի ԱԳ նախարար Յոհան Վադեֆուլը նոյեմբերի 19-ին ասել էր, թե ԱՄՆ-ն չի տեղեկացրել պլանի մասին, իսկ կանցլերի գրասենյակի ղեկավար Թորստեն Ֆրայը մի օր անց հայտարարել էր, որ անձամբ տեղյակ չէ այդ նախաձեռնությունից։

Նշվում է, որ ծրագրի մանրամասների արտահոսքից հետո Բեռլինում «իրական խուճապ» է սկսվել։ Bild-ի աղբյուրների տեղեկություններով էլ՝ կանցլեր Ֆրիդրիխ Մերցը շտապ սկսել է զանգահարել եվրոպացի գործընկերներին, իսկ կառավարությունը խորապես անհանգստացած է պլանի հնարավոր հետևանքներից։

Հիշեցնենք, որ ԱՄՆ նախագահ Դոնալդ Թրամփը հաստատել է 28 կետից կազմված խաղաղության ծրագիր, որի նպատակն է դադարեցնել Ռուսաստանի և Ուկրաինայի միջև շարունակվող պատերազմը։ Փաստաթուղթը ներառում է Ուկրաինայի՝ ՆԱՏՕ-ին չմիանալու պայման, նոր սահմանների ձևավորում, բուֆերային գոտու ստեղծում, Ուկրաինայի ԶՈւ հնարավորությունների սահմանափակում և այլն: