ԿԸՀ-ն որոշել է 3 դիտորդական առաքելության չզրկել հավատարմագրումից. նիստը 10 ժամ է տևել. Իոաննիսյան

ԿԸՀ-ն երկարատև՝ 10 ժամ տևած նիստում քննարկել է«Անկախ դիտորդ» և «Ականատես» առաքելությունների դիմումներով բարձրացված հարցը՝ «Հայաքվե»-ի, «Իրավունքի և արդարության կենտրոն Թաթոյան» հիմնադրամի և «Պառլամենտարիզմի զարգացման միջազգային կենտրոն»-ի դիտորդական առաքելություններին կողմնակալության հիմքով հավատարմագրումից զրկելու հարցը։

Այս մասին սոցցանցի իր էջում հայտնել է «Անկախ դիտորդ» նախաձեռնության ներկայացուցիչ, «Իրազեկ քաղաքացիների միավորում» հասարակական կազմակերպության համակարգող Դանիել Իոաննիսյանը:

«Արդյունքում հանձնաժողովը, արձանագրելով, որ նշված առաքելությունները խնդրահարույց արարքներ են արել, այնուամենայնիվ, ֆորմալ, չարձանագրեց Ընտրական օրենսգրքով սահմանված անկողմնակալության պահանջի խախտումը և չզրկեց այդ կազմակերպություններին դիտորդության իրավունքից։

«Հայաքվե» առաքելությունը համաձայնեց, որ այն դիտորդները, ովքեր արել են վիճելի հայտարարություններ, չեն մեկնի ընտրական տեղամասեր։

ԿԸՀ-ի որոշ մոտեցումներ մեզ համար խնդրահարույց են, բայց այս հարցերը կքննարկենք ընտրություններից հետ (այդ թվում` օրենսդրության հստակեվման մասով)։

Սա, թերևս, ԿԸՀ պատմության մեջ ամենաերկար նիստն էր` 10 ժամ և 20 րոպե»,- ասված է գրառման մեջ։