Չեմ կարծում, թե ադրբեջանական կողմի շահերից է բխում այս որոշումը չկատարելը․ Եղիշե Կիրակոսյան

. Դատարանի որոշումը Լաչինի միջանցքի հարցով առանցքային կարևորություն ունի, որովհետև դատարանի որոշումներն իրավաբանորեն պարտադիր են: «Հանրային հեռուստաընկերության» հետ զրույցում այս մասին ասել է միջազգային հարցերով ՀՀ ներկայացուցիչ Եղիշե Կիրակոսյանը` անդրադառնալով ՄԱԿ–ի արդարադատության միջազգային դատարանի այսօրվա որոշմանը։

Կիրակոսյանի խոսքով` դատարանի որոշումն ուժի մեջ է մտնում այն հրապարակելու պահից։

«Դատարանի նախագահը, երբ ընթերցում էր որոշումը, շեշտեց, որ այն առաջացնում է իրավաբանական պարտավորություն։ Փաստացի ստացվում է, որ բացի եռակողմ պարտավորությունից, Ադրբեջանն ունի ևս մեկ իրավաբանական պարտավորություն` ապահովել Լաչինի միջանցքով, բեռների, անձանց անվտանգ տեղափոխումը երկու ուղղությամբ: Սա առանցքային կարևոր զարգացում է թե՛ անվտանգային, թե՛ իրավական առումով»,–ասել է Կիրակոսյանը։

Նրա խոսքով` որոշումը պետք է քաղաքական առումով օգտագործվի հայկական կողմից հնարավոր բոլոր հարթակներում։

Հարցին՝ եթե Ադրբեջանը չկատարի դատարանի պահանջը, ապա ի՞նչ կարող է հետևել դրան` Կիրակոսյանը պատասխանեց, որ դա նախ լավ արձագանք չի ունենա միջազգային հանրության կողմից.«Ադրբեջանի կողմից նման որոշումների չկատարումն առաջացնելու է առնվազն երկրի հեղինակության խնդիր, նաև լուրջ բարդություններ։ Հայկական կողմն էլ պետք է ամեն ինչ անի՝ ադրբեջանական կողմին և միջազգային հանրությանն անընդհատ հիշեցնելու այս նոր պարտավորության մասին և, այդ դեպքում, չեմ կարծում, թե ադրբեջանական կողմի շահերից է բխում այս որոշումը չկատարելը»։