Այս տարի գլխավոր տոնածառը կլինի նոր լույսերով ու ճյուղերով. աշխատանքների համար հատկացվել է 600 մլն դրամ

Երևանի փողոցներում արդեն մեկնարկել են ամանորյա ձևավորումների աշխատանքները։ Ինչպես նշեց Երևանի քաղաքապետարանի առևտրի, ծառայությունների և գովազդի վարչության պետ Արմեն Առաքելյանը Aysor.am-ի հետ զրույցում, այս տարի մայրաքաղաքը պատրաստվում է տոնական օրերին նոր շեշտադրումներով և արդիականացված լուսավորությամբ։ Նրա խոսքով՝ ձևավորումների իրականացման համար անցկացվել է մրցույթ՝ նախաորակավորման ընթացակարգով, որի արդյունքներն արդեն ամփոփվել են։

«Մրցույթը ավարտվել է, ունենք հաղթող կազմակերպություններ, և այժմ պայմանագրերի կնքման փուլում ենք։ Աշխատանքները հիմնականում կենտրոնացած են լինելու Կենտրոն վարչական շրջանում», — նշել է Առաքելյանը։

Այս տարվա ամանորյա ձևավորումների բյուջեն մնացել է անցյալ տարվա մակարդակի վրա՝ 600 միլիոն դրամ։ Այդ միջոցներով նախատեսվում է զարդարել քաղաքի մի շարք տարածքներ՝ Հաղթանակի կամուրջ, Թումանյան և Աբովյան փողոցներ, Սարյանի և Կոնսերվատորիայի պուրակներ, Հյուսիսային պողոտա և Հանրապետության հրապարակ։

Ինչ վերաբերում է մայր տոնածառին՝ այն այս տարի կունենա նոր տեսք․ նոր լույսեր, նոր ճյուղեր ու նոր գագաթ:

Քաղաքապետարանի տվյալներով՝ նոր ոճի տոնածառեր կտեղադրվեն նաև մայրաքաղաքի բոլոր վարչական շրջաններում։ Տոնածառերի տեղադրումը կիրականացնի Երևանի համապատասխան ՀՈԱԿ-ը, իսկ լույսերի ու ձևավորման աշխատանքները՝ վարչական շրջանների աշխատակազմերը։