Քաղաքացու բերանը փակել և եկեղեցուց հանել են՝ նրա անվտանգությունից ելնելով. Փաշինյան
Վարչապետ Նիկոլ Փաշինյանը պարզաբանել է հոկտեմբերի 26-ին Հովհաննավանքում տեղի ունեցած միջադեպը, երբ կարգալույծ քահանայի մատուցած «պատարագի» ժամանակ քաղաքացի Հայկ Դորունցին ուժով դուրս էին բերել եկեղեցուց։
«Պետական պահպանության ծառայությունից բացատրություններ եմ խնդրել։ Ասել են, որ որոշումը կայացվել է նաև այդ քաղաքացու անվտանգությունն ապահովելու նկատառումով, որովհետև նրա պահվածքը մարդկանց շրջանում որոշակի ագրեսիվություն կարող էր առաջացնել։ Դրա համար է այդ քայլն արվել»,- նշել է Փաշինյանը կառավարության նիստից հետո լրագրողների հետ զրույցում։
Միջադեպը տեղի էր ունեցել այն ժամանակ, երբ Դորունցը «իրավունք չունեք պատարագ անել» խոսքերով ընդհատել էր կարգալույծ հոգևորականի արարողությունը։
