Չգիտեմ՝ Պուտինն ում նկատի ուներ․ Սամվել Կարապետյանը՝ ռուսական աջակցության մասին

«Ուժեղ Հայաստան» դաշինքի առաջնորդ Սամվել Կարապետյանը Հակակոռուպցիոն դատարանի մոտ լրագրողների հետ զրույցում հայտարարել է, որ քաղաքական ուժին ռուսական աջակցություն չի ցուցաբերվել։

«Դուք հետևել եք ամբողջ պրոցեսին, տեսե՞լ եք ինչ-որ աջակցություն՝ գոնե ամենամինիմալ»,- դիմելով մեդիայի ներկայացուցիչներին՝ ասել է Կարապետյանը։

Լրագրողների կողմից հիշեցմանը, որ Վլադիմիր Պուտինը Նիկոլ Փաշինյանի հետ ունեցած հանդիպման ժամանակ ցանկություն էր հայտնել, որպեսզի ռուսամետ ուժերը հնարավորություն ունենան մասնակցել ՀՀ Ազգային ժողովի ընտրություններին, ինչպես նաև փաստել էր, որ «նրանցից ոմանք ազատազրկման վայրերում են, չնայած ռուսական անձնագիր ունեն», դաշինքի ղեկավարն արձագանքել է. «Չգիտեմ՝ Պուտինն ինչ է ասել, ում է նկատի ունեցել»։

Սամվել Կարապետյանը միաժամանակ հստակեցրել է, որ իրենց քաղաքական կառույցից շուրջ 20 հոգի ունեն Ռուսաստանի Դաշնության անձնագիր, սակայն ո՛չ այդ անձինք են առաջադրվել որպես թեկնածու, ո՛չ էլ անձամբ ինքը։