Որքան թոշակ են ստանում ՀՀ նախկին նախագահներն ու ԱԺ պատգամավորները. ՀԵՏՔ
2025թ․-ի 9 ամսվա ընթացքում պետական բյուջեի միջոցներից ՀՀ նախկին նախագահների կենսաթոշակների վճարման համար հատկացվել է մոտ 31 միլիոն 450 հազար դրամ։
Այս պահին կենսաթոշակ է ստանում 3 նախկին նախագահ։ Աշխատանքի և սոցիալական հարցերի նախարարության փոխանցած տվյալներով՝ նրանց յուրաքանչյուրի ամսական կենսաթոշակը 1 միլիոն 164 հազար 800 դրամ է։
Այս մասին հայտնում է ՀԵՏՔ-ը:
«Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքով սահմանվում է, որ պաշտոնաթող նախագահի համար, բացառությամբ պաշտոնանկության դեպքի, նշանակվում է հատուկ կենսաթոշակ` Հանրապետության նախագահի` օրենքով սահմանված պաշտոնային դրույքաչափի 70 տոկոսի չափով:
Ազգային ժողովի նախկին պատգամավորներից այս պահին կենսաթոշակ է ստանում 189-ը: Պատգամավորների միջին ամսական թոշակը, ըստ Աշխատանքի և սոցիալական հարցերի նախարարության, մոտ 190 հազար դրամ է։ Պատգամավորական ամենացածր թոշակը 157 հազար դրամ է։
Հիշեցնենք, որ Հայաստանում սահմանված նվազագույն թոշակը 36 հազար ՀՀ դրամ է։
Մանրամասները՝ սկզբնաղբյուր կայքում։
