Կահիրեի համաձայնագիրը ՄԱԳԱՏԷ-ի հետ այլևս ուժի մեջ չէ. Իրանի ԱԳՆ

Իրանի արտաքին գործերի նախարար Աբաս Արաղչին հայտարարել է, որ ՄԱԿ-ի կողմից Թեհրանի նկատմամբ պատժամիջոցների վերականգնման՝ snapback մեխանիզմի ակտիվացման պատճառով Կահիրեի համաձայնագիրը, որը ձեռք էր բերվել Թեհրանի և Միջազգային ատոմային էներգիայի գործակալության (ՄԱԳԱՏԷ) միջև, այլևս չի գործում։

Բարձրաստիճան իրանցի դիվանագետը այս հայտարարությունն արել է  այսօր՝ Թեհրանում դեսպանների, ժամանակավոր հավատարմատարների և օտարերկրյա ու միջազգային ներկայացուցչությունների ղեկավարների հետ հանդիպումից հետո՝ լրագրողների հետ զրույցում։

Արաղչին նշել է, որ Իրանը իր միջուկային ծրագրի խաղաղ բնույթը և երկրի բարի կամքը ցույց տալու համար անցել է բոլոր դիվանագիտական ​​փուլերը, շարունակել է համագործակցությունն ու խորհրդակցությունները և ներկայացրել կառուցողական և հավասարակշռված առաջարկներ։ Նա ընդգծել է, որ նախկին սպառնալիքները, ներառյալ ռազմական գործողությունները և եվրոպական երկրների կողմից գործադրված ճնշումները, արդյունք չեն տվել և միայն բարդացրել են բանակցային գործընթացը։

«Արևմտյան երկրներն այժմ որևէ արդարացում չունեն խոչընդոտելու Իրանի հետ համագործակցությանը կամ բանակցություններին։ Իրանի դիրքորոշումները լիովին օրինական են և արդարացված, և երկիրը պատրաստ է իրականացնել ցանկացած միջոցառում, որը կապահովի վստահություն», նշել է Իրանի արտաքին գործերի նախարարը։

Հիշեցնենք, որ snapback մեխանիզմը նախաձեռնվել է Եվրաեռյակի երկրների՝ Ֆրանսիայի, Մեծ Բրիտանիայի և Գերմանիայի կողմից։