Զելենսկին պատրաստ է հրաժարական տալ
Ուկրաինայի նախագահ Վլադիմիր Զելենսկին հայտարարել է, որ պատերազմի ավարտից հետո երկիրը կառավարելու ծրագրեր չունի։ Նա այս մասին հայտարարությունն արել է «The Axios Show»-ի եթերում։
Բացի այդ, պետության ղեկավարը խոստացել է դիմել Ուկրաինայի խորհրդարանին՝ ընտրություններ կազմակերպելու խնդրանքով, եթե հրադադար կնքվի։
Հարցին, թե արդյոք պատերազմի ավարտից հետո իր աշխատանքն ավարտված կհամարի, նա պատասխանել է, որ «պատրաստ» կլինի հրաժարական տալ։
«Իմ նպատակը պատերազմը դադարեցնելն է, այլ ոչ թե պաշտոնի համար պայքարը շարունակելը», - վստահեցրել է Ուկրաինայի նախագահը։
Ուկրաինայի առաջնորդի խոսքով՝ անվտանգության իրավիճակը և երկրի սահմանադրությունը որոշակի մարտահրավերներ են ներկայացնում, բայց նա կարծում է, որ ընտրությունները հնարավոր են։
Զելենսկին հավելել է, որ ԱՄՆ նախագահ Դոնալդ Թրամփի հետ հանդիպման ժամանակ ինքը հայտարարել է, որ եթե հրադադար լինի, «մենք կարող ենք օգտագործել այս ժամանակահատվածը, և ես կարող եմ նման ազդանշան տալ խորհրդարանին»։
Միաժամանակ նա ընդգծել է, որ անվտանգության հարցերը կբարդացնեն ընտրությունների կազմակերպումը, բայց կարծում է, որ դա կարելի է անել։
