Երեք կործանիչ մտել է մեր օդային տարածք, աննախադեպ է. Էստոնիան բողոքի նոտա է հղել Ռուսաստանին
Էստոնիայի արտաքին գործերի նախարարությունը կանչել է Էստոնիայում Ռուսաստանի գործերի ժամանակավոր հավատարմատարին՝ բողոքի նոտա հանձնելու և սեպտեմբերի 19-ին Էստոնիայի օդային տարածքը խախտելու վերաբերյալ։ Այս մասին հայտնել է Էստոնիայի արտաքին գործերի նախարարությունն իր կայքում։
Ներխուժումը տեղի է ունեցել Ֆինլանդական ծոցի վրայով, որտեղ Ռուսաստանի Դաշնության երեք ՄիԳ-31 կործանիչներ առանց թույլտվության մտել են Էստոնիայի օդային տարածք և այնտեղ մնացել ընդհանուր առմամբ 12 րոպե։
«Ռուսաստանը այս տարի արդեն չորս անգամ խախտել է Էստոնիայի օդային տարածքը, ինչն ինքնին անընդունելի է։ Սակայն այսօրվա ներխուժումը, որի ընթացքում երեք կործանիչ մտել է մեր օդային տարածք, աննախադեպ է: Ռուսաստանի կողմից սահմանային ստուգումների աճող ծավալմանը և աճող ագրեսիվությանը պետք է պատասխան տրվի», - ասել է արտաքին գործերի նախարար Մարգուս Ցախնան։
Հավելենք՝ սկսվել են Էստոնիայի պաշտպանական ուժերի չնախատեսված վարժանքներ, որոնք ուղղված են օդային սահմանի խախտումներին արձագանքելուն։
Հիշեցնենք՝ սեպտեմբերի 17-ին Էստոնիայի ներքին գործերի նախարար Իգոր Տարոն հայտարարել էր, որ երկիրը ներկայումս հիմքեր չունի Ռուսաստանի հետ սահմանը փակելու։ Վերջերս Լատվիայի խորհրդարանը քվեարկեց «Զապադ» զորավարժությունների ժամանակ Ռուսաստանի և Բելառուսի հետ երկրի սահմանները լիովին փակելու օգտին։ Լեհաստանը նույնպես փակեց իր սահմանը Բելառուսի հետ։
