Չպետք է վտանգավոր մեսիջներ ուղարկի հարևան պետություններին․ ՔՊ-ից՝ Արարատը կնիքներից հանելու մասին

Չի կարող ապաքաղաքական ուժը հանձն առնի և լուծի աշխարհաքաղաքական խնդիրները, նույնիսկ եթե իրենք խոսում են բիզնեսներից, սակայն եկեք չմոռանանք, որ բիզնես միջավայրը ստեղծվում է քաղաքականության միջոցով: Այս մասին խորհրդարանական ճեպազրույցների ժամանակ, անդրադառնալով գործարար Սամվել Կարապետյանի որդու՝ Սարգիս Կարապետյանի հայտարարությանը, ասել է ՔՊ պատգամավոր Տիգրան Պարսիլյանը։

Հիշեցնենք, որ օրեր առաջ Սարգիս Կարապետյանը հայտարարել էր, որ «այս խմբակին 268 օր է մնացել»։

Անդրադառնալով անցակետերում կնիքների վրայից Արարատ լեռան խորհրդանշիը հեռացնելուն՝ ՔՊ խմբակցության քարտուղար Արթուր Հովհաննիսյանը նշել է. «ՀՀ-ն ելնում է իր պետական սիմվոլներից և ՀՀ կնիքը պետք է արտահայտի պետության սիմվոլիզմը և զերծ լինի էմոցիոնալ, հուզական սիմվոլներից։ Մենք ամեն բան անում ենք, որ ՀՀ-ի վերաբերյալ տարընկալումներ չլինեն և մեր կողմից օգտագործվող կնիքները, սիմվոլները ելնեն բացառապես պետականության սկզբունքից։

Մեր յուրաքանչյուր գործողություն չպետք է վտանգավոր մեսիջներ ուղարկի ՀՀ հարևան պետություններին։ ՀՀ-ն սուվերեն պետություն է և կնիքները, որոնք արտահայտում են ՀՀ-ն աշխարհում, պետք է արտահայտեն ՀՀ սիմվոլը։ Ես ցավում եմ, որ որոշ շրջանակներ այս պարզ տրամաբանությունը շատ լավ իմանալով, փորձում են հաղորդել հուզական ֆոն։ Այստեղ որևէ դավադրական բան չկա»։