Պուտինը «խաղեր է խաղում» Վաշինգտոնի հետ. Զելենսկի

Ուկրաինայի նախագահ Վոլոդիմիր Զելենսկին ABC News-ին տված հարցազրույցում հայտարարել է, որ Ալյասկայում կայացած ԱՄՆ և Ռուսաստանի նախագահների գագաթնաժողովը Վլադիմիր Պուտինին ապահովել է այն արդյունքով, որը նա սպասում էր։

«Ցավալի է, որ Ուկրաինան այդ հանդիպմանը ներկա չէր, քանի որ կարծում եմ՝ Թրամփը Պուտինին տվել է այն, ինչ նա ցանկանում էր։ Պուտինի մեծագույն ցանկությունը հենց ԱՄՆ նախագահի հետ հանդիպումն էր, և նա դա ստացավ։ Դա չափազանց ցավալի է», - նշել է Զելենսկին։

Նրա խոսքով՝ Պուտինը խուսափում է իր հետ հանդիպումից, սակայն ձգտում է շփումների ԱՄՆ ղեկավարի հետ։ Զելենսկին ընդգծել է, որ Պուտինը առաջարկում է հանդիպման պայմաններ, որոնք ինքը չի կարող ընդունել, և հավելել, որ նա «խաղեր է խաղում» Վաշինգտոնի հետ։

Հարցին՝ կդիմավորի՞ արդյոք Պուտինը նրան Մոսկվայում, Զելենսկին պատասխանել է ժպիտով․ «Թող ինքը գա Կիև։ Ես չեմ կարող մեկնել Մոսկվա, երբ իմ երկիրը ամեն օր ենթարկվում է հրթիռային հարձակումների»։

Ինչ վերաբերում է Ուկրաինայի հաղթանակի իր պատկերացմանը, նախագահը նշել է, որ դա նախևառաջ երկրի գոյատևումն է․

«Պուտինի նպատակը Ուկրաինայի օկուպացումն է։ Նա ցանկանում է ամբողջությամբ գրավել մեզ։ Դա նրա համար կլինի հաղթանակ։ Իսկ քանի դեռ նա դրան չի հասել, հաղթանակը մերն է։ Մեզ համար գոյատևումը հենց հաղթանակ է, քանի որ մենք շարունակում ենք ապրել՝ պահպանելով մեր ինքնությունը, երկիրը և անկախությունը», - ասել է Ուկրաինայի նախագահը։