Օվերչուկը զգուշացնում է Հայաստանին. Հարավային Կովկասում արտատարածաշրջանային խաղացողների ներկայությունը մտահոգիչ է

Հարավային Կովկասում արտատարածաշրջանային խաղացողների հնարավոր ներկայությունը մտահոգիչ է, մտավախություն կա, որ նրանց ներկայությունը կխախտի ստեղծված հավասարակշռությունը այս շատ փխրուն տարածաշրջանում։ Այս մասին «Ռիա Նովոստի»-ին տված հարցազրույցում հայտարարել է ՌԴ փոխվարչապետ Ալեքսեյ Օվերչուկը:

«Չի կարելի չասել, որ մտահոգություն կա Հարավային Կովկասում արտատարածաշրջանային ներկայացուցիչների հնարավոր ներկայության վերաբերյալ։ Մտավախություն կա, որ նման ներկայությունը կխախտի ստեղծված հավասարակշռությունը այս շատ փխրուն տարածաշրջանում»,- Օվերչուկն այս մասին ասել է Արևելյան տնտեսական ֆորումում՝ պատասխանելով այն հարցին, թե արդյոք կան ռիսկեր Ռուսաստանի համար՝ կապված «Զանգեզուրի միջանցքի» վերահսկողությունը 99 տարի ժամկետով Միացյալ Նահանգներին փոխանցելու հետ։