Պուտինը՝ ուկրաինական ճգնաժամի լուծման հարցում Ռուսաստանի մոտեցման մասին
Ռուսաստանն ուկրաինական ճգնաժամի հարցում որդեգրել է այն մոտեցումը, որ ոչ մի երկիր չի կարող ապահովել իր անվտանգությունը մյուսի հաշվին: Այս մասին Շանհայի համագործակցության կազմակերպության (ՇՀԿ) անդամ պետությունների ղեկավարների խորհրդի նիստում հայտարարել է Ռուսաստանի նախագահ Վլադիմիր Պուտինը։
Նա նշել է, որ ՇՀԿ-ն զգալի ներդրում է կատարում ամբողջ եվրասիական մայրցամաքում համագործակցության և փոխվստահության մթնոլորտի ամրապնդման գործում՝ դրանով իսկ օգնելով քաղաքական և սոցիալ-տնտեսական նախադրյալներ դնել Եվրասիայում կայունության, անվտանգության և խաղաղ զարգացման նոր համակարգի ձևավորման համար:
«Համակարգը, որը կփոխարիներ հնացած եվրակենտրոն և եվրատլանտյան մոդելներին և հաշվի կառներ երկրների հնարավորինս լայն շրջանակի շահերը, իսկապես հավասարակշռված կլիներ, ուստի թույլ չէր տա որոշ պետությունների փորձերը՝ ապահովել իրենց անվտանգությունը ուրիշների անվտանգության հաշվին։ Օգտվելով առիթից՝ ուզում եմ ասել, որ ռուսական կողմը նույն մոտեցումներն ունի նաև Ուկրաինայի շուրջ ճգնաժամի հարցում», - ասել է Ռուսաստանի նախագահը։
Ավելի վաղ Պուտինը նշել էր Ուկրաինայում հակամարտության երկարաժամկետ կարգավորման պայմանները։
Հիշեցնենք՝ Չինաստանում օգոստոսի 31-ից սեպտեմբերի 1-ը անցկացվում է ՇՀԿ պատմության մեջ խոշորագույն գագաթաժողովը, որին մասնակցում են օտարերկրյա պետությունների ավելի քան 20 առաջնորդներ, ինչպես նաև միջազգային կազմակերպությունների ներկայացուցիչներ։
