Իրանը մեղադրում է եվրոպացիներին ԱՄՆ քաղաքականությանը հետևելու մեջ

Եվրոպական երկրները կորցրել են իրենց անկախությունը և պարզապես հետևում են ԱՄՆ նախագահ Դոնալդ Թրամփի վարչակազմի քաղաքականությանը Իրանի միջուկային ծրագրի վերաբերյալ: Այս մասին հայտարարել է Իրանի արտաքին գործերի նախարարության խոսնակ Էսմայիլ Բաղայիը բրիտանական The Guardian թերթին տված հարցազրույցում:

«Եվրոպացիները անում են այն, ինչ Թրամփը թելադրում է նրանց», - ասել է նա: «Եվրոպացիների դերը կնվազի: Եթե հետ նայեք միջուկային համաձայնագրի պատմության ընթացքում եվրոպական արտաքին քաղաքականության առաջնորդներին, կտեսնեք, որ Խավիեր Սոլանան, Քեթի Էշթոնը, Ֆեդերիկա Մոգերինին և Ժոզեֆ Բորելը փորձել են կապող օղակ լինել Իրանի և ԱՄՆ-ի միջև: Նրանք փորձել են ապացուցել, որ հուսալի բանակցային գործընկերներ են: Բայց հիմա եվրոպացիները որոշել են դառնալ ԱՄՆ-ի և Իսրայելի լիազոր ներկայացուցիչները: Նրանց կողմից բացարձակապես անպատասխանատու էր այս դերը հանձնել ԱՄՆ-ին»,- նշել է Բաղային։

Մասնավորապես, Բաղայիը ուշադրություն հրավիրեց Գերմանիայի կանցլեր Ֆրիդրիխ Մերցի հայտարարությունների վրա, որը, խոսելով հունիսին Իրանի վրա Իսրայելի հարվածների մասին, ասել է, որ Իսրայելը «կեղտոտ աշխատանքն» է կատարում արևմտյան երկրների համար: «Որոշակի իմաստով, բոլոր եվրոպական երկրները հավանություն են տվել Իսրայելի գործողություններին և, ամենայն հավանականությամբ, տեղեկատվություն են տրամադրել Իսրայելին», - նշել է Իրանի արտաքին գործերի նախարարության խոսնակը։

Նա ընդգծել է, որ Իրանը պատրաստ է դուրս գալ Միջուկային զենքի չտարածման մասին պայմանագրից, եթե ՄԱԿ-ի Անվտանգության խորհուրդը երկարաձգի Թեհրանի դեմ պատժամիջոցները։