Հայաստանի Սահմանադրությունում կա մի դրույթ, որը կասկածի տակ է դնում համաձայնագրի վերջնական ստորագրումը․ Ալիև
Ադրբեջանի նախագահ Իլհամ Ալիևը նշել է, որ գրեթե հինգ տարի առաջ՝ 44-օրյա Հայրենական պատերազմի ժամանակ, Ադրբեջանը վերականգնեց արդարությունը, միջազգային իրավունքը և սեփական արժանապատվությունը՝ վերադարձնելով իր հողերը։ Դրանից հետո գործընթացում առաջացավ որոշակի վակուում, քանի որ միջնորդները չգիտեին, թե ինչ անել հաջորդիվ։
«Եվ կրկին, հենց Ադրբեջանն էր, որ առաջարկեց սկսել խաղաղության գործընթաց Հայաստանի հետ։ Կրկնում եմ, մենք էինք, որ նախաձեռնեցինք բանակցային ձևաչափը։ Մենք նաև ներկայացրեցինք խաղաղության համաձայնագրի նախագիծ։ Ըստ էության, օգոստոսի 8-ին Վաշինգտոնում նախաստորագրված փաստաթուղթը հիմնված է Հայաստանի և Ադրբեջանի միջև միջպետական հարաբերությունների կարգավորման տեսլականի ադրբեջանական տարբերակի վրա։
Ինչպես ասացի, բանակցությունները տևեցին մի քանի տարի և ավարտվեցին Վաշինգտոնում՝ նախագահ Թրամփի և նրա թիմի ակտիվ աջակցությամբ: Ես կարծում եմ, որ սա իսկապես հակամարտության ավարտն է, պատերազմի ավարտը: Պաշտոնապես խաղաղության համաձայնագիր չի ստորագրվել մեկ կոնկրետ պատճառով. Հայաստանի սահմանադրությունը դեռևս պարունակում է մի դրույթ, որը կասկածի տակ է դնում Ադրբեջանի տարածքային ամբողջականությունը:
Ինչքան մենք հասկանում ենք, նրանք կկատարեն փոփոխություն։ Եվ հենց որ այս սահմանադրական փոփոխությունը կատարվի, հենց որ Ադրբեջանի նկատմամբ տարածքային պահանջները հանվեն, կստորագրվի պաշտոնական խաղաղության համաձայնագիր։
Սակայն այն փաստը, որ Ադրբեջանն ու Հայաստանը նախաստորագրեցին այս փաստաթուղթը Սպիտակ տանը՝ նախագահ Թրամփի ներկայությամբ, արդեն նշանակում է պատերազմի ավարտ, որը ընդհատումներով տևել է ավելի քան երեսուն տարի։ Սա բացում է բոլորովին նոր հնարավորություններ Հարավային Կովկասի տարածաշրջանի և Կենտրոնական Ասիայի ու Մերձավոր Արևելքի ավելի լայն տարածաշրջանի համար», - նշել է Ադրբեջանի նախագահը։
