Չինաստանը չի դառնա Ուկրաինայի անվտանգության երաշխավորներից մեկը
Չինաստանը, հավանաբար, չի դառնա Ուկրաինայի անվտանգության երաշխավորներից մեկը, չնայած Ռուսաստանի կողմից նման հնարավորության մասին հայտարարություններին: Չինացի փորձագետների այս կարծիքը մեջբերում է South China Morning Post-ը:
Վերլուծաբանների կարծիքով՝ Պեկինը կարող է քաղաքական կամ դիվանագիտական աջակցություն ցուցաբերել մարտական գործողությունները դադարեցնելու համար, սակայն նրան պակասում են անվտանգության երաշխիքներ տրամադրելու խթանն ու ռեսուրսները։
Չինական Horizon Insights Centre վերլուծական կենտրոնի տնօրեն Չժու Ջունվեյի խոսքով՝ Պեկինը էական դեր չի խաղա Ուկրաինայի անվտանգության երաշխիքների վերաբերյալ ապագա քննարկումներում։ Նա նշել է, որ կան տարբեր տեսակի երաշխիքներ, և պարզ չէ, թե ինչ տեսակի երաշխիքների մասին է խոսում ռուսական կողմը։
«Անվտանգության երաշխիքների վերաբերյալ ցանկացած նոր համաձայնագիր պետք է հաշվի առնի, թե ինչպես դարձնել դրույթները իսկապես գործունակ», - ասել է փորձագետը։
Նրա խոսքով՝ Չինաստանը կարող է պատրաստ լինել ՄԱԿ-ի մեխանիզմների շրջանակներում քննարկել անվտանգության միջոցառումները և մասնակցել դրանց, «սակայն ներկայումս նման մասնակցության նշաններ չկան»։
