Կքննարկվի Մինսկի խմբի փակման հարցը՝ ի պատասխան Ադրբեջանի և Հայաստանի համատեղ կոչի
Ֆինլանդիան, որպես Եվրոպայի անվտանգության և համագործակցության կազմակերպության (ԵԱՀԿ) գործող նախագահ, կվարի քննարկումներ մասնակից պետությունների հետ՝ ի պատասխան Ադրբեջանի և Հայաստանի համատեղ կոչի՝ փակել Մինսկի գործընթացը և դրան առնչվող կառույցները։ Դրա մասին ադրբեջանական լրատվամիջոցներին հայտնել են կազմակերպության գլխավոր գրասենյակում։
Իր հերթին, ԵԱՀԿ քարտուղարությունը պատրաստ է իրականացնել այդ քննարկումների արդյունքում ընդունված բոլոր որոշումները, հայտարարել է կազմակերպության պաշտոնական ներկայացուցիչը։
ԵԱՀԿ-ն հաստատել է, որ օգոստոսի 11-ին Ադրբեջանից և Հայաստանից ստացվել է համատեղ կոչ՝ Նախարարների խորհրդին առաջարկով լուծել Մինսկի խմբի և այլ դրանց առնչվող կառույցների փակման հարցը։
«Ողջունում ենք օգոստոսի 8-ին Վաշինգտոնում ստորագրված համաձայնագրերը, շնորհավորում ենք Հայաստանին և Ադրբեջանին այս ձեռքբերման կապակցությամբ և բարձր ենք գնահատում ԱՄՆ վարչակազմի դերը այս գործընթացին նպաստելու գործում»,- ընդգծել է կազմակերպությունը։
Ըստ կազմակերպության պաշտոնական ներկայացուցչի՝ ԵԱՀԿ-ն շարունակում է հավատարիմ մնալ Հարավային Կովկասում երկարատև խաղաղության և կայունության հաստատմանն ուղղված բոլոր ջանքերին։
Բացի երեք համանախագահ երկրներից՝ ԱՄՆ-ից, Ռուսաստանից և Ֆրանսիայից, խմբում են նաև Բելառուսը, Գերմանիան, Իտալիան, Թուրքիան, Ֆինլանդիան և Շվեդիան, Հայաստանը և Ադրբեջանը։
