Իրանի և ԱԷՄԳ ներկայացուցիչների միջև բանակցություններ կարող են տեղի ունենալ առաջիկա օրերին
Իրանի և Ատոմային էներգիայի միջազգային գործակալության (ԱԷՄԳ) ներկայացուցիչների միջև բանակցություններ կարող են տեղի ունենալ առաջիկա օրերին։
Այս մասին մամուլի ասուլիսում հայտարարել է Իրանի արտաքին գործերի նախարարության խոսնակ Էսմայիլ Բաղային․ «Բանակցությունները սկսվել են նախորդ շաբաթ, և Իրանի ու ԱԷՄԳ-ի միջև բանակցությունների մեկ փուլ, հավանաբար, տեղի կունենա առաջիկա օրերին», - հայտարարել է Բաղային։
Նա անդրադարձել է ԱԷՄԳ-ի գլխավոր տնօրենի տեղակալի այցին՝ նշելով, որ այցի նպատակն էր մշակել ձևաչափ այն մասին, թե ինչպես են Իրանը և ԱԷՄԳ-ն փոխգործակցելու Իրանի միջուկային օբյեկտների վրա Իսրայելի և ԱՄՆ հարձակումներից հետո։ Նա նաև հայտնել է, որ Իրանը կարող է միջոցներ ձեռնարկել իր միջուկային ծրագրի խաղաղ բնույթն ապահովելու համար, եթե անարդար պատժամիջոցները վերացվեն։ «Մենք հայտարարել ենք, որ մեր միջուկային ծրագրի խաղաղ բնույթի վերաբերյալ երաշխիքներ տալու համար պատրաստ ենք մի շարք միջոցառումներ ձեռնարկել՝ պայմանով, որ անարդար պատժամիջոցները վերացվեն», - ընդգծել է նա։
Բաղային նաև հայտնել է, որ եվրոպական երեք երկրները՝ Մեծ Բրիտանիան, Գերմանիան և Ֆրանսիան կապի մեջ են Իրանի հետ, և Թեհրանը չի բացառում բանակցությունների ևս մեկ փուլ անցկացնելու հնարավորությունը, սակայն այս պահին հարցի վերաբերյալ որոշում դեռևս չի կայացվել։
Հիշեցնենք՝ հուլիսի 2-ին Իրանի նախագահ Մասուդ Փեզեշքիանը ստորագրել էր օրենք, որով դադարեցնում էր համագործակցությունը ԱԷՄԳ-ի հետ: Հուլիսի 22-ին Իրանի արտաքին գործերի նախարար Աբբաս Արաղչին հայտարարել էր, որ Իրանը չի բացառում գործակալության տեսուչների՝ ապագայում իր տարածք վերադառնալու հնարավորությունը:
