Եթե Ռուսաստանը շարունակի հարվածել Ուկրաինայի էներգետիկ օբյեկտներին, Բաքուն պատասխան քայլեր կձեռնարկի
Եթե Ռուսաստանը շարունակի հարվածել Ուկրաինայի էներգետիկ օբյեկտներին, Բաքուն կսկսի քննարկել Ուկրաինային զենքի մատակարարման վրա դրված արգելքը վերացնելու հարցը, հաղորդում են ադրբեջանական լրատվամիջոցները։
Ավելի վաղ հաղորդել էինք, որ Ռուսաստանը հարվածել է Ուկրաինայի Օդեսայի մարզում գտնվող Ադրբեջանի պետական նավթային ընկերության (SOCAR) նավթամբարին։
ՌԲԿ-Ուկրաինա հրատարակության աղբյուրների համաձայն՝ հարվածը հասցվել է հինգ Shahed անօդաչու թռչող սարքերի միջոցով։ Հարձակումը հրդեհ է առաջացրել և վնասել է դիզելային խողովակը։ Ընկերության չորս աշխատակից վիրավորվել են՝ բոլորը ծանր վնասվածքներ են ստացել և հոսպիտալացվել։ Հրդեհը արագորեն մարվել է, և վերանորոգման աշխատանքներ են ընթանում։ Ուկրաինայի իրավապահ մարմինների տվյալներով՝ հարվածները թիրախային են եղել։
Սա վերջին շաբաթների ընթացքում SOCAR-ի հետ կապված օբյեկտներին ուղղված երկրորդ հարվածն է. նախկինում վնասվել էր Օրլովկայի մոտ գտնվող գազաբաշխիչ կայանը, որի միջով պետք է հոսի ադրբեջանական գազը։
