Հայաստանն ու Ադրբեջանը կստորագրեն փոխըմբռնման հուշագիր

Սպասվում է, որ Ադրբեջանն ու Հայաստանը  Վաշինգտոնում կստորագրեն փոխըմբռնման հուշագիր՝ պարտավորվելով ձգտել խաղաղության. հայտնում է Middle East Eye-ը՝ հղում անելով իր աղբյուրներին:

Պարբերականի աղբյուրները հայտնել են, որ ԱՄՆ նախագահ Դոնալդ Թրամփը Սպիտակ տանը ստորագրման արարողության ժամանակ կընդունի Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին:

«Սպասվում է, որ երկու առաջնորդները կստորագրեն «Մտադրությունների մասին հուշագիր», ոչ թե խաղաղության համաձայնագրի նախագիծ, ինչը Թրամփին կապահովի դիվանագիտական նվաճում, որին նա ձգտում էր տարածաշրջանում անցյալ ամիս»,- նշվում է հոդվածում։

Հատկանշական է, որ ըստ Middle East Eye-ի՝ Ադրբեջանի արտաքին գործերի նախարար Ջեյհուն Բայրամովը երկուշաբթի օրը զանգահարել է իր թուրք գործընկեր Հաքան Ֆիդանին, որպեսզի նրան տեղեկացնի գագաթնաժողովի մասին: Նշենք, որ Թուրքիայի ԱԳՆ աղբյուրները հայտնել էին, որ Ֆիդանը Բայրամովի հետ քննարկել է երկկողմ և տարածաշրջանային հարցեր:

«Գլխավոր խոչընդոտներից մեկը մնում է «Զանգեզուրի միջանցքը», որը Հայաստանի տարածքով կմիացներ Ադրբեջանն իր էքսկլավ Նախիջևանի հետ։ Հայաստանը մերժում է «Զանգեզուրի միջանցք» եզրույթը՝ պնդելով, որ այն իր մեջ կրում է իռեդենտիստական հետևանքներ իր ինքնիշխան տարածքի՝ Սյունիքի համար»,- գրում է պարբերականը։