Ռուսաստանը պնդում է` Ուկրաինան հարձակվել է իրենց առաջատար Ռադիոգործարանի վրա

Ռուսաստանի պաշտպանության նախարարությունը հայտնել է, որ այսօր  հինգ շրջանների և բռնակցված Ղրիմի վրայով խոցվել է 32 անօդաչու թռչող սարք։

Առավոտյան Պենզայի բնակիչները հայտնել են պայթյունների մասին։ Մարզի նահանգապետ Օլեգ Մելնիչենկոն գրել է, որ անօդաչու թռչող սարքերը հարձակվել են արդյունաբերական ձեռնարկություններից մեկի վրա։  «Ձեռնարկության տարածքում հրդեհ է բռնկվել, որը ներկայումս մարվում է», - նշել է նա։ 

Ուկրաինական ԶԼՄ-ները գրում են, որ անօդաչու թռչող սարքերը հարձակվել են Ռադիոգործարանի վրա, որը ռադիոէլեկտրոնիկայի ոլորտի առաջատար ձեռնարկություններից մեկն է։ Գործարանը «Ռոստեխ» հոլդինգային «Ռոսէլեկտրոնիքս» ընկերության մաս է կազմում։

Վոլգոգրադի մարզի Կոտելնիկովո քաղաքում գիշերային հարձակումից հետո հրդեհ է բռնկվել։ Պաշտպանության նախարարությունը հայտնել է, որ տարածաշրջանի վրայով խոցվել է 11 անօդաչու թռչող սարք։ Նահանգապետ Անդրեյ Բոչարովը գիշերային հարձակումն անվանել է «զանգվածային»։ Նրա խոսքով՝ դրա թիրախը «տրանսպորտային և էներգետիկ օբյեկտներն» էին։