ՀՅԴ անդամ 18-ամյա Անդրանիկ Չամիչյանը կալանավորվեց

ՀՅԴ Հայաստանի երիտասարդական միություն (ՀԵՄ) անդամ, 18-ամյա Անդրանիկ Չամիչյանը 2 ամսով կալանավորվեց։ Այս մասին հայտնել է փաստաբան Ռուբեն Մելիքյանը։

«Անունը դրեցին ահաբեկչության նախապատրաստություն, թե դա ինչ ահաբեկչություն էր, ում դեմ էր արվում, որևէ տեղեկություն քննչական մարմինները այս պահի դրությամբ չունեն»,-ասել է Մելիքյանը։

Նրա խոսքով` դատարանը սակայն մերժել է քննչական մարմնի միջնորդությունը տեսակցություններն արգելելու մասին։

«Դատարանն այդ մարդասիրական քայլն արեց և առողջական լուրջ խնդիրներ ունեցող տղային թույլատրեց, որպեսզի ծնողները կարողանան նրան տեսակցել»,-ասել է Մելիքյանը։

Նա ընդգծել է, որ տղան այնպիսի առողջական խնդիր ունի, որը խոչընդոտ է բանակում ծառայելու համար։ Մելիքյանի խոսքով` քննչականը ընդամենը հայտնաբերել է սթրայքբոլ խաղի համար նախատեսված պարագաներ։

«Իմ պաշտպանյալի մոտից չի հայտնաբերվել գեթ մեկ առարկա, որ ինքնին կլիներ ապօրինի։ Հայտնաբերված նռնակը ոչ մի կապ չունի իմ պաշտպանյալի հետ։ Սկզբում նրան ձերբակալել էին 2 հոդվածով` ահաբեկչության նախապատրաստման և ապօրինի ռազմամթերք պահելը։ Մեղադրանք առաջադրելիս ապօրինի ռազմամթերք պահելու հոդվածը հանեցին»,- նշել է Մելիքյանը։

Նա պարզաբանել է, որ Չամիչյանը այդ խաղի պարագաները տոպրակով տարել թողել է տատիկի տանը, ասել է մի քանի օրից հետ կվերցնեմ, տատիկն էլ մտածել է պետքական չէ, աղբի հետ դուրս է հանել, քաղաքացիներն էլ տեսել են ու ահազանգել իրավապահներին։

Ըստ Մելիքյանի` իրավապահներն էլ նախընտրել են ոչ թե լսել ու ստուգել երիտասարդի պարզաբանումները, այլ միանգամից համարել են դրանք ոչ արժանահավատ և սկսել կառուցել այսպիսի պատմություն միայն այն պատճառով, որ Չամիչյանը ՀՅԴ ՀԵՄ անդամ է։

Փաստաբանը ավելացրել է, որ մտադիր են բողոքարկել դատարանի վճիռը։