Մայր աթոռից պարզաբանել են՝ ինչու է Սամվել Կարապետյանի նկարը փակցված վեհարանում
Հայ առաքելական եկեղեցում ընդունված է փակցնել եկեղեցուն աջակցած բարերարների նկարները։ Ի պաշտպանություն Սամվել բարերար, գործարար Սամվել Կարապետյանի կազմակերպված երթից առաջ լրագրողների հետ զրույցում այս մասին հայտնել է Մայր աթոռ Սուրբ Էջմիածնի Եկեղեցական հայեցակարգային բաժնի տնօրեն, Հոգեշնորհ Տ. Ռուբեն վարդապետ Զարգարյանը։
«Մայր տաճարի զանգակատունը, որն իր ոճով շքեղ ճարտարապետական կառույց է՝ ի տարբերություն բուն տաճարի, որը պարզ կառուցվածք ունի, կառուցվել է 17-րդ դարում։ Ճակատին բարերար Անտոն Չելեպի Սարոյանի դիմապատկերն է։ Որևէ մեկը չի ասում՝ այս ում դիմապատկերն է, որովհետև այդ բարերարը այլևս չի ապրում և մրցակից չէ մեզ։ Մայր աթոռում գործում է Ռուբեն Սևակի թանգարանը, որի հենց մուտքի ամբողջ հավաքածուն նվիրաբերած ընտանիքի ամուսինների դիմապատկերներ են։ Բայց երբեք շահարկում տեղի չի ունեցել»,– ասել է Ռուբեն վարդապետ Զարգարյանը։
Վարդապետն ընդգծել է՝ հայրենի պետությունը մեկ լումա չի տվել Էջմիածնի Մայր տաճարի վերակառուցման համար։ Գործարար Սամվել Կարապետյանը վերակառուցել է Էջմիածնի կաթողիկոսական նստավայրը՝ կառուցելով նաև նոր միջոցառումների սրահ և մատուռ։
«Հիմա Սամվել Կարապետյանի նկարը կախված է այն շենքում, որը հենց ինքն է հովանավորել։ Ընդ որում՝ տաճարում չէ, այլ վեհարանի շենքում, որը նույնիսկ վեհարանի հետ այդքան կապ չունի, զուտ շարունակություն է, ու դա էլ թանգարային հատված է»,– մանրամասնել է Ռուբեն վարդապետը։
