Ադրբեջանն ո՛չ ձևական, ո՛չ էլ բովանդակային առումով, բողոքներ չի ունեցել․ Զախարովա

Ադրբեջանի Հանրապետությունում «Սպուտնիկ Ադրբեջան» լրատվական գործակալության դեմ բողոքներ չեն եղել: Այս մասին «Սպուտնիկ» ռադիոկայանի եթերում հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, գրում է «ՏԱՍՍ»-ը:

«Ցանկանում եմ ուշադրություն հրավիրել այն փաստի վրա, որ այս բոլոր տարիներին այս լրատվամիջոցն աշխատել է, նրա աշխատակիցների մեծ մասը Ադրբեջանի քաղաքացիներ էին, այնտեղ կային Ռուսաստանի Դաշնության քաղաքացիներ, և ադրբեջանական կողմը երբեք որևէ բողոք չի ունեցել այս լրատվամիջոցի վերաբերյալ՝ ո՛չ ձևական, ո՛չ էլ բովանդակային առումով»,- հավելել է դիվանագետը։

Հավելենք՝ Բաքվի դատարանը որոշել է 4 ամսով կալանավորել «Սպուտնիկ Ադրբեջան»-ի Բաքվի մասնաճյուղի տնօրենին և գլխավոր խմբագրին։

Նշենք նաև, որ Իրանից թմրանյութերի տարանցման գործով Բաքվում ձերբակալված ՌԴ 8 քաղաքացիներից 4-ը 4 ամսով կալանավորվել են։