Ես այստեղ եմ հստակ ուղերձով․ ԵՄ-ն պատրաստ է դրան․ Կայա Կալլաս
Մեր հարաբերություններում առանցքային տեղ են զբաղեցնում ժողովուրդ-ժողովուրդ շփումները: Ահա թե ինչու ենք զարգացնում մուտքի արտոնագրերի ազատականացման երկխոսությունը: Այս մասին ՀՀ ԱԳՆ-ում արտգործնախարար Արարատ Միրզոյանի հետ հանդիպմանը հայտարարել ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալլասը:
«Ուրախ եմ հայտարարել, որ Եվրոպական հանձնաժողովն ընդունել է մուտքի արտոնագրերի ազատականացման գործողությունների ծրագրի առաջարկը, և երբ պայմանները կատարվեն, գործընթացն ավարտին հասցվի, այն ավելի մոտ կդարձնի միմյանց Եվրամիությունը և Հայաստանը»,- ասել է նա:
Նրա խոսքով՝ Եվրամիությունը պատրաստ է խորացնել համագործակցությունը Հայաստանի հետ:
«Հաճույքով հայտարարում եմ նոր գործընկերության օրակարգի շուրջ բանակցող կողմերի միջև քաղաքական համաձայնության մասին, որը սահմանում է մեր առաջնահերթությունները տնտեսական զարգացման, անվտանգության և դիմակայունության ոլորտներում: ԵՄ-ն այս առումով տրամադրում է 270 մլն եվրո «Դիմակայունություն և աճ» ծրագրի շրջանակներում 2024-2027 թվականների համար: Սա նախատեսում է աջակցություն բիզնեսներին՝ բարելավելու փոխկապակցվածությունը Հայաստանի և Եվրամիության միջև, նպաստում է բարեփոխումներին ուղղված ջանքերին»,- նշել է նա:
Կալլասը ընդգծել է, որ ՀՀ-ԵՄ հարաբերությունները չեն սահմանափակվում միայն տնտեսական կապերով. ԵՄ-ն ԼՂ-ից բռնի տեղահանվածներին նաև բնակարանաշինության և սոցիալ-հոգեբանական աջակցություն է տրամադրում:
