Ադրբեջանի ԱԳՆ-ն՝ «Զանգեզուրի միջանցքի» բացման կարևորության մասին

Բաքուն և Երևանը ավելի քան երբևէ մոտ են խաղաղության համաձայնագրի ստորագրմանը: Այս մասին հայտարարել է  Ադրբեջանի նախագահի հատուկ ներկայացուցիչ Էլչին Ամիրբեկովը։

Սակայն դրա համար, ըստ ադրբեջանցի պաշտոնյայի, պետք է վերացվեն երկու հիմնական խոչընդոտներ։

«Նախ՝ խոսքը Հայաստանի Սահմանադրության այն դրույթների մասին է, որոնք պարունակում են Ադրբեջանի նկատմամբ տարածքային պահանջներ։ Երկրորդ՝ ԵԱՀԿ Մինսկի խմբի միջնորդական մեխանիզմներից հրաժարվելու անհրաժեշտությունը»,- ասել է պաշտոնյան։

Ադրբեջանի նախագահի ներկայացուցիչը նաև նշել է «Զանգեզուրի միջանցքի» բացման կարևորությունը, որը կկապի Ադրբեջանի հիմնական մասը Նախիջևանի հանրապետության հետ:

«Այս 40 կիլոմետրանոց երթուղին արմատապես կփոխի տարածաշրջանի լոգիստիկ քարտեզը և կամրապնդի կայունությունը»,- նշել է նա։

Ամիրբեկովը նաև վստահություն է հայտնել, որ խաղաղության համաձայնագրի ստորագրումը նոր էջ կբացի ամբողջ Հարավային Կովկասի համար։