Ագարակի անցակետը տաքսու վարորդներով հագեցած է
Վարորդներից Auroranews-ը բողոքներ է ստացել, այս անգամ խնդիրը Սյունիք մարզում:
Մասնավորապես վարորդները հայտնում են, որ Ագարակ անցակետում անկառավարելի իրավիճակ է: Երևանից՝ և անհատ վարորդներ և օնլայն տաքսիների վարորդներ գնում են անցակետ մարդկանց բերելու համար, սակայն նրանց համար խնդիրներ են ստեղծում:
Ինչ որ ընկերություն կա, որը տեղում ուղևորափոխադրում է իրականացնում, և Երևանից ուղևորված վարորդները օրերով սպասում են ,թե հերթը երբ է իրենց հասնելու:
Տաքսու վարորդները նշում են, որ Ագարակի անցակետում վեճեր ու տարբեր խոսակցություններ են առաջանում: Իրանից եկող մարդկանց հոսքը շատ է, ուստի իրավիճակը կանոնակարգելու խնդիր կա:
Auroranews-ը դիմել է Սյունիքի մարզպետարան, որտեղից հղում արեցին Սյունիքի մարզպետ Ռոբերտ Ղուկասյանի հայտարարությանը, որն արվել է 4 օր առաջ:
ՀՀ տարածքային կառավարման և ենթակառուցվածքների նախարարի հանձնարարականով՝ Հայաստան-Իրան սահմանային անցակետի մոտից փոքր և միջին չափի ավտոբուսները ստանդարտ գնով մարդկանց տեղափոխում են Երևան: Որոշումը կայացվել է այն բանից հետո, երբ տաքսի ծառայությունները Իրանից Հայաստան ժամանածներից անարդարացի բարձր վճար էին պահանջել:
Սյունիքի մարզպետ Ռոբերտ Ղուկասյանը հայտնել է, որ անցակետում մինչ այս պահը մարդկային կուտակումներ չեն եղել, սահմանը հատող մարդկանց հոսքը սովորական ծավալի է: Սակայն առաջացել էր տաքսիների հետ կապված հայտնի պատմությունը:
«Ձևավորվել էր արհեստական գնագոյացում, ինչը անթույլատրելի էր: Հետևաբար, մեր գործընկերների հետ քննարկելով, որոշեցինք, որ կլինեն փոքր և միջին ավտոբուսներ, որոնք արդեն իսկ գործում են:
Ավտոբուսներն արդեն մաքսատանն են, դրանց վրա պարսկերենով գրված է, որ մեկ նստատեղն արժե շուրջ 12 000 դրամ: Մարդիկ կարող են նստել ու տեղափոխվել Երևան», - ասել էր Ղուկասյանը:
Մարզպետը պարզաբանել է, որ սահմանը հատողների թվում են նաև մարդիկ, ովքեր աշխատանքով Իրանում էին ու հետո պետք է վերադառնային իրենց երկրներ: Սակայն քանի որ Իրանի օդային տարածքը փակ է, նրանք ցամաքային ճանապարհով՝ Հայաստանով պետք է մեկնեն, անցակետից հասնեն Զվարթնոց օդանավակայան, ապա այնտեղից ուղևորվեն իրենց երկրներ:
Վերլուծելով իրավիճակը, հարգելի վարորդներ, այս պահին գուցե նաև անիմաստ է դարձել գնալ Երևանից Ագարակ՝ ուղևորափոխադրումներ իրականացնելու համար:
