Պենտագոնը ՉԹՕ-ի մասին տարիներ շարունակ ապատեղեկատվություն է տարածել

Պենտագոնը տարիներ շարունակ ՉԹՕ-ների մասին ապատեղեկատվություն է տարածել՝ գաղտնի ռազմական ծրագրերը թաքցնելու համար: Գրում է The Wall Street Journal-ը: 

Հրապարակման համաձայն՝ 1980-ականներին ԱՄՆ ռազմաօդային ուժերի աշխատակիցը թռչող ափսեների կեղծ լուսանկարներ է ուղարկել Նևադայի «51-րդ գոտի» գաղտնի օբյեկտի մոտ գտնվող բարի սեփականատիրոջը։ Սա գաղտնի ինքնաթիռների փորձարկումները թաքցնելու գործողության մի մասն էր։

Ռազմական ղեկավարները վախենում էին, որ ծրագիրը կբացահայտվի, ուստի որոշել են, որ եթե տեղացիները ինչ-որ կերպ տեսնեն փորձնական թռիչք, ապա ավելի շուտ կհավատան, որ դա ՉԹՕ է։

«Բոլորը խորամանկություն էր՝ թաքցնելու համար, թե իրականում ինչ էր կատարվում «51-րդ գոտում»: Ռազմաօդային ուժերը օգտագործում էին այդ օբյեկտը գերգաղտնի, կործանիչներ մշակելու համար, որոնք համարվում էին կարևոր առավելություն Խորհրդային Միության դեմ», - ասվում է հոդվածում։

WSJ-ն գրում է, որ հարյուրավոր զինվորականներ, որոնք ստորագրել են գաղտնիության մասին համաձայնագրեր, կարծում էին, որ ՉԹՕ-ների մասին իրենց հետազոտությունները իրական են։ Նրանցից ոմանք դեռևս հավատում են այլմոլորակայինների միջամտությանը։