Այս օրը կարող է պատմական դառնալ Հենրիխ Մխիթարյանի համար. ՉԼ-ի եզրափակիչ է սպասվում

Այսօր, Երևանի ժամանակով 23:00-ին, կկայանա Չեմպիոնների լիգայի 2024/25 մրցաշրջանի եզրափակիչը, որում ֆրանսիական ՊՍԺ-ն կմրցի իտալական «Ինտերի» հետ: Այս հանդիպումը կարող է պատմական դառնալ Հայաստանի ֆուտբոլի ազգային հավաքականի նախկին ավագ Հենրիխ Մխիթարյանի համար, ով նախկինում հաղթել է կոնֆերենցիաների լիգայում և ՈՒԵՖԱ-ի Չեմպիոնների լիգայում: Եթե Մխիթարյանին հաջողվի հաղթել նաև այս եզրափակիչը, նա կդառնա պատմության մեջ միակ ֆուտբոլիստը, ով խաղացել և հաղթել է եվրոպական չեմպիոնների գավաթի երեք եզրափակիչ: Եզրափակիչը տեղի կունենա Գերմանիայի Մյունխեն քաղաքի «Ալյանց Արենա» մարզադաշտում: Միջազգային լրատվամիջոցներն այս եզրափակիչն անվանում են «երիտասարդության խաղ ընդդեմ փորձի»: «Ինտերի» մեկնարկային կազմի միջին տարիքը 30 տարի 4 ամիս է, իսկ «Պարի Սեն Ժերմենը»՝ 24 տարի 7 ամիս:

«Ինտերի» կազմում ընդգրկված են 8 ֆուտբոլիստներ, ովքեր վերջին անգամ Չեմպիոնների լիգայի եզրափակչում խաղացել են երկու տարի առաջ: «Ինտերը» երեք անգամ հաղթել է Չեմպիոնների լիգայում՝ 1963-64, 1964-65, 2009-10: ՊՍԺ-ն ոչ մի անգամ չի նվաճել այդ տիտղոսը։

Corriere della Sera-ն հարցազրույց է ունեցել ֆրանսիական ֆուտբոլի լեգենդ Յուրի Ջորկաեֆի հետ, ով խորհրդանշական կերպար է ինչպես ՊՍԺ-ի, այնպես էլ «Ինտերի» երկրպագուների համար: Ջորկաեֆը, ով 1995/96 մրցաշրջանում ՊՍԺ-ի կազմում նվաճել է Գավաթակիրների գավաթը, իսկ 1996-1999 թվականներին «Ինտերի» կազմում դարձել է ՈւԵՖԱ-ի Գավաթի հաղթող (1998)։

Ջորկաեֆի համար այս եզրափակիչը յուրահատուկ է, քանի որ կապված է իր կարիերայի երկու կարևոր ակումբների հետ:

Ջորկաեֆը ջերմությամբ է խոսել Հենրիխ Մխիթարյանի մասին, հիշելով մի հետաքրքիր պահ․ «Ճիշտ է, ես նրա հետ լուսանկար ունեմ, երբ նա դեռ երեխա էր: Շատ ուրախ եմ Հենրիխ Մխիթարյանի և նրա ընտանիքի համար: Նրանք իսկապես արժեքներով մարդիկ են: Հենրիխը ողջ աշխարհում բարձր է պահում Հայաստանի դրոշը»,- նշել է Ջորկաեֆը։