Ինչու՞ Ռուսաստանի հավաքականները չեն մասնակցի 2026 թվականի օլիմպիական խաղերին
Ռուսաստանի մարզական հավաքականները, այդ թվում՝ Ռուսաստանի հոկեյի ազգային հավաքականը, չեն կարողանա մասնակցել Միլանում և Կորտինա դ'Ամպեցոյում կայանալիք 2026 թվականի ձմեռային օլիմպիական խաղերին: Այդ մասին հայտարարել է Միջազգային օլիմպիական կոմիտեն (ՄՕԿ):
Նշվում է, որ համապատասխան արգելքը, որը կիրառվել է Ուկրաինայում պատերազմի կապակցությամբ, մնում է ուժի մեջ: ՄՕԿ-ի հայտարարության պատճառը ռուսաստանյան լրատվամիջոցներում հրապարակված հաղորդագրություններն են Ռուսաստանի հոկեյի ֆեդերացիայի և Միջազգային հոկեյի ֆեդերացիայի (IIHF) ներկայացուցիչների միջև օլիմպիական խաղերին Ռուսաստանի հոկեյի ազգային հավաքականի հնարավոր մասնակցության մասին:
«ՄՕԿ-ի գործադիր խորհրդի 2023 թվականի մարտի որոշումը Ռուսաստանի անձնագրեր ունեցող մարզիկների թիմերի վերաբերյալ մնում է ուժի մեջ: Այս որոշումը հիմնված է այն փաստի վրա, որ անհատական մրցող չեզոք կարգավիճակ ունեցող մարզիկների խումբը, ըստ սահմանման, չի կարող համարվել թիմ»,- գրել է Reuters-ը հղում անելով ՄՕԿ-ին:
ՄՕԿ-ի մանրակրկիտ ուսումնասիրությունից հետո Ռուսաստանից և Բելառուսից մի քանի մարզիկի թույլատրվել էր չեզոք կարգավիճակով՝ առանց ազգային ատրիբուտների, մասնակցել 2024 թվականին Փարիզի ամառային օլիմպիական խաղերին:
