Հնդկաստանը բացել է օդանավակայանները Պակիստանի համար

Հնդկաստանը Պակիստանի հետ հակամարտության սրման պատճառով ավելի վաղ փակված 32 օդանավակայան է բացել երկրի հյուսիսում և արևմուտքում, հաղորդում է News18 հեռուստաալիքը:

Հնդկաստանի պաշտպանության նախարարության ներկայացուցիչ Սունիլ Բարթվալը հայտնել է, որ Ջամու և Քաշմիրում Հնդկաստանի և Պակիստանի միջև շփման գծում գիշերը հանգիստ է անցել, միջադեպերի մասին տեղեկություններ չեն ստացվել:

«Որևէ միջադեպի մասին տեղեկություն չի ստացվել, սա վերջին օրերի ընթացքում առաջին հանգիստ գիշերն է եղել»,-ասել է նա:

Ավելի վաղ Հնդկաստանի իշխանությունները Պակիստանի հետ լարվածության սրման ֆոնին հայտնել էին երկրի 487 օդանավակայաններից 32-ի փակման մասին: Հնդկաստանի օդանավակայանների վարչությունը և համապատասխան ավիացիոն մարմինները մի շարք ծանուցումներ էին տարածել օդաչուների համար այն մասին, որ 2025 թվականի մայիսի 9-ից 14-ը բոլոր քաղաքացիական թռիչքների համար հյուսիսային և արևմտյան Հնդկաստանի 32 օդանավակայաններ ժամանակավոր փակվում են՝ շահագործման հետ կապված խնդիրների պատճառներով:

Հավելենք՝ լարվածության առիթ է դարձել ապրիլի 22-ին Հնդկաստանի Ջամու և Քաշմիր նահանգի զբոսաշրջային Պահալգամ քաղաքում մի խումբ զբոսաշրջիկների վրա հարձակումը, որի հետևանքով զոհվել է Հնդկաստանի 25 և Նեպալի 1 քաղաքացի:

Հնդկաստանը ահաբեկչության մեջ մեղադրել է «Լաշքար-է-Թայբա» խմբավորմանը, ինչպես նաև հայտարարել Պակիստանի միջգերատեսչական հետախուզության ներգրավվածության մասին: