Ռուսաստանը չի համակերպվի պարտադրվող կանոններին. Շոյգու
ՆԱՏՕ-ում և Եվրամիությունում մեկնարկել են ծրագրեր, որոնք ուղղված են հավաքական Արևմուտքին Ռուսաստանի հետ ուղղակի ռազմական հակամարտության նախապատրաստմանը։ Այս մասին հայտարարել է ՌԴ Անվտանգության խորհրդի քարտուղար Սերգեյ Շոյգուն, գրում է «ՏԱՍՍ»-ը։
«Լոնդոնի և Փարիզի կողմից հրահրվող և հովանավորվող եվրոպական էլիտաները շարունակում են աչքի ընկնել Ռուսաստանին ռազմավարական պարտություն հասցնելու անհրաժեշտության մասին աղաղակող հայտարարություններով։ Այս նյարդայնացնող աղմուկի նվագակցությամբ ՆԱՏՕ-ում և Եվրամիությունում մեկնարկել են ծրագրեր, որոնք ուղղված են հավաքական Արևմուտքին Ռուսաստանի հետ ուղղակի ռազմական հակամարտության նախապատրաստմանը։ Այս ագրեսիվ քայլերը, ինչպես նաև ՆԱՏՕ -ի շարունակական առաջխաղացումը դեպի արևելք, դեպի Ռուսաստանի սահմաններ, գեբելսյան քարոզչության լավագույն ավանդույթներով հիմնավորվում են ռուսատյաց հերյուրանքներով»,- հայտարարել է Շոյգուն:
Նրա խոսքով՝ ձևավորվել է պետությունների համաշխարհային մեծամասնությունը, որոնք Ռուսաստանի օրինակով չեն ցանկանում համակերպվել Արևմուտքի կողմից կոպտորեն պարտադրվող «կանոնների վրա հիմնված կարգի» հետ։
